Bakı-Qroznı reysini həyata keçirməli olan AZAL təyyarəsinin Aktau hava limanı yaxınlığında qəzaya uğramasından 5 ay keçsə də, Rusiya hadisə bağlı aparılan istintaq haqqında konkret heç bir məlumat açıqlamır.
APA-nın araşdırması nəticəsində məlum olub ki, Azərbaycan tərəfi hər ay bu məsələ ilə bağlı Rusiya tərəfinə müraciət edir. Lakin qarşı tərəf müxtəlif bəhanələrlə istintaqı uzadır, müraciətlərə cavab vermir.
“Bu 5 ay ərzində Rusiya tərəfindən heç bir istintaq hərəkətləri aparılmır. Qəzanın baş verməsində günahı və məsuliyyəti olan şəxslərdən heç kim barəsində həbs qətimkan tədbiri seçilməyib”, - deyə mənbə qeyd edib.
Mənbə onu da deyib ki, bu yaxınlarda Azərbaycan və Rusiya hüquq-mühafizə orqanları arasında məsələ ilə bağlı növbəti yazışma olub, amma yenə nəticə yoxdur: “Azərbaycan tərəfi Rusiyadan məsələ ilə bağlı konkret addımlar gözləyir”.
Siyasi şərhçi Əziz Əlibəyli Sherg.az-a bildirib ki, Rusiya bu məsələdə günahını etiraf edib nəticələrinin aradan qaldırılması istiqamətində konkret addımlar atarsa, bu, onun beynəlxalq aləmdə zəif və geri çəkilən bir aktor kimi görünməsinə səbəb ola bilər:
"Bu yanaşma, sadəcə texniki və hüquqi çərçivədə dəyərləndirilə bilməz; məsələ həm də iki ölkə arasında münasibətləri gərginləşdirən ciddi diplomatik narazılıqlar doğurur. Azərbaycanın səssiz qalması isə məqsədəuyğun deyil. Əksinə, rəsmi Bakı bu mərhələdə daha prinsipial, ardıcıl və ciddi mövqe sərgiləməli, gələcək üçün təsirli diplomatik addımlar atmalıdır. Unutmaq olmaz ki, Azərbaycanın regionda sülh və sabitlik təşəbbüsləri, Ermənistanla normallaşma prosesi və ümumilikdə geopolitik maraqları fonunda Rusiyanın tutduğu mövqe mühüm əhəmiyyət kəsb edir. Bu baxımdan, maraq doğuran əsas suallardan biri də budur: Kreml Azərbaycanın əsas tələbləri və gözləntiləri qarşısında susqunluğunu hansı siyasi və hüquqi arqumentlərlə əsaslandırmağa çalışacaq"?
