Fevralın 8-də Azərbaycanın müdafiə naziri Zakir Həsənov ölkəmizdə səfərdə olan Türkiyənin milli müdafiə nazirinin müavini Muhsin Dərənin rəhbərlik etdiyi nümayəndə heyəti ilə görüşüb. Müdafiə naziri Azərbaycan ilə Türkiyə arasında hərbi əməkdaşlığın yüksələn xətlə inkişaf etdiyini vurğulayıb. O, hər iki ölkənin dövlət başçılarının səmimi münasibətlərinin hərbi əməkdaşlığa müsbət təsir etdiyini deyib. Z.Həsənov strateji müttəfiqliyin dostluq və qardaşlıq əlaqələri üzərində qurulduğunu da qeyd edib. M.Dərə də qarşılıqlı əməkdaşlığın genişləndirilməsi baxımından bu cür görüşlərin vacib olduğunu bildirib. Görüşdə Bakıda keçiriləcək “Texnofest-2022” festivalından da bəhs edilib.
Festivalda Azərbaycan Hərbi Hava Qüvvələrinin vasitələrinin və hərbi qulluqçularının iştirakı barədə fikir mübadiləsi aparılıb. Sonda Azərbaycan-Türkiyə arasında ikitərəfli əməkdaşlığın inkişaf perspektivləri, o cümlədən hərbi-texniki sahədə birgə işçi qruplarının yaradılması və qarşılıqlı maraq doğuran digər məsələlər müzakirə edilib.
İki qardaş ölkə rəsmilərinin görüşlərinin əhəmiyyətini "Sherg.az"a şərh edən ehtiyatda olan hərbi polkovnik Şair Ramaldanov bildirib ki, görüşlərin keçirilməsi Azərbaycan ordusunun inkişafı baxımından vacibdir:
“Azərbaycan və Türkiyə arasında hərbi əməkdaşlıq getdikcə genişlənir. Xüsusilə “Şuşa Bəyannaməsi”ndən sonra iki dövlət arasında hərb sahəsində islahatların aparılması üçün mühüm müzakirələr aparılır.
Zakir Həsənov Türkiyə hərbi rəhbərliyi ilə görüşlər keçirərək islahatların istiqamətini müəyyənləşdirir. Azərbaycan və Türkiyə ordularının birgə fəaliyyəti nəticəsinds hərbi quruluşumuz qardaş ölkədəkinə bənzər olacaq. İrəliləyişin əldə edilməsi üçün müəyyən qruplar işləyir. Müvafiq komissiyalar tərəfindən təkliflər hazırlanır.
Təklifləri həyata keçirmək üçün hər iki ordu rəhbərliyinin rəyi önəmlidir. Buna görə də görüşlərin sayı daha çox olacaq. Ordunun təkmilləşməsi üçün birgə təlimlərin keçirilməsi də vacibdir.
Bütün növ silahlı qüvvələr iştirak etməli, tapşırıqları yerinə yetirməli, döyüş hazırlığı artırılmalıdır.
Ordu quruculuğunda yeniliklərlə bağlı müəyyən planlar hazırlanır. Komissiya öz işini bitirdikdən sonra hüquqi sənəd üçün yenidən ordu rəhbərləri bir araya toplaşacaq. Görüşlər nəticəsində Azərbaycanda Türkiyə ordusunun modeli qurulacaq. Bunun şahidi olacağıq.
Danışıqların aparılması Ali Baş Komandanın gələcəkdə ola biləcək hər hansısa əmrini icra etmək baxımından da vacibdir”.
Xanlar ƏLİBƏY
