Türkiyə Prezidenti Rəcəb Tayyib Ərdoğanın rəsmi dəvəti ilə Türkiyədə səfərdə olan NATO-nun baş katibi Jens Stoltenberq və Türkiyə Xarici İşlər naziri Mövlud Çavuşoğlunun İstanbulda birgə mətbuat konfransı keçirildi.
Xarici İşlər naziri Çavuşoğlu ilk öncə mart ayında keçirilən Antalya Diplomatik Forumunda iştirakına görə NATO baş katibinə təşəkkür etdi, daha sonra bu günkü toplantıda Madrid Zirvəsində alınan qərarların müzakirə edildiyini bildirdi: Madrid Zirvəsinin önəmli məsələləri terrorla mübarizə, Egedəki durum və Finlandiya ilə İsveçin NATO-ya üzv qəbul edilməsidir. Türkiyə hər zaman NATO-nun genişlənməsinə, güclənməsinə və fəaliyyətinə öz töhfələrini vermişdir. Hələ də davam edən Rusiya Ukrayna savaşında biz Ukraynanın torpaq bütünlüyünü, müstəqilliyini və suverenliyini Türkiyə olaraq güclü bir şəkildə dəstəkləyirik, çünki işğala məruz qalan Ukrayna torpaqlarıdır, onun üçün də onlara adil davranmaq lazımdır. Ukraynadan taxıl ixracatında yaranan sıxıntı isə cənab prezident Rəcəb Tayyib Ərdoğanın liderliyində danışıqlar yoluyla çözüldü və bu prosesin davamlı olması üçün səylərimizi davam etdirəcəyik.
NATO baş katibi Stoltenberq isə ilk öncə Rusiya-Ukrayna savaşında Türkiyənin mövqeyi və Ukraynaya verdiyi dəstək üçün Türkiyəyə təşəkkür etdi və bildirdi ki, bu savaşda Türkiyənin PUA-ları Ukraynaya çox böyük dəstək oldu, amma İranın Rusiyaya yardımlarını da açıq aydın görürük. Taxıl anlaşmasında da Türkiyənin vasitəçiliyini yüksək qiymətlindirən NATO baş katıbı prezident Ərdoğanın bu istiqamətdə səylərini yüksək qiymətləndirdi. O, həmçinin bu ilin iyun ayında keçirilən Madrid Zirvəsində Türkiyənin İttifaqı dəstəklədiyi üçün cənab nazirə təşəkkür etdi və bu günkü müzakirələrin gələcək proseslər üçün çox əhəmiyyətli olduğunu vurğuladı.
Yaqut Misirxanlı,
İstanbuldan xüsusi olaraq “Şərq” qəzeti üçün
