Aİ-nin missiyası sülhdə maraqlı olsaydı, İrəvanın sabitliyi pozmaq cəhdlərinin qarşısını alardı
Xarici işlər naziri Ceyhun Bayramov Avropa Xarici Fəaliyyət Xidmətinin Şərq Tərəfdaşlığı məsələləri üzrə xüsusi nümayəndəsi Dirk Şubeli ilə görüşüb. Postmünaqişə dövründə regionda mövcud vəziyyəti qonağın diqqətinə çatdıran C.Bayramov Ermənistanın öhdəliklərindən boyun qaçırdığını, davamlı hərbi-siyasi təxribatlar törətdiyini və bunların sülh quruculuğu prosesinə xələl gətirdiyini diqqətə çatdırıb. Ceyhun Bayramov son dövrlərdə Ermənistan tərəfindən törədilən təxribatların intensivləşməsinin Avropa İttifaqının Ermənistandakı missiyasının mövcudluğu dövrünə təsadüf etməsinin narahatlıq doğurduğunu deyib. Nazir sözügedən missiyadan bəhanə kimi sui-istifadə edilməsinin yolverilməz olduğunu vurğulayıb. Xüsusi nümayəndə Dirk Şubel, son dövrlərdə nəqliyyat-kommunikasiya sahəsində yaranmış çağırışların Şərq-Qərb Dəhlizinin önəmini artırdığını diqqətə çatdıraraq, Azərbaycanın bölgədə nəqliyyat və kommunikasiyaların açılması istiqamətində fəaliyyətinin təqdirəlayiq olduğunu bildirib. Görüşdə, həmçinin qarşılıqlı maraq doğuran digər məsələlər ətrafında fikir mübadiləsi aparılıb.
Politoloq Azər Rəşidoğlu "Şərq"ə bildirib ki, Ermənistanda yerləşdirilən və Aİ adından fəaliyyət göstərən müşahidəçilər keçmiş jandarm, polis və kəşfiyyat orqanlarının nümayəndələridir. Ekspertin fikrincə, Aİ missiyasının fəaliyyəti məlumat toplamaq, kəşfiyyat işləri aparmaq, qərar tutduqları yerlərin relyefini öyrənməkdən ibarətdir: "Lakin reallığı görmək üçün Avropa İttifaqının Ermənistandakı missiyasının rəhbəri Markus Ritterin polis məmuru vəzifəsi ilə kamuflyaj edilmiş kəşfiyyatçı fəaliyyətinə nəzər yetirmək kifayət edir. Onun 2005-ci ildə Kosovoda, 2007-2008-ci illərdə Gürcüstanda, 2012-2013-cü illərdə Cənubi Sudanda və 2017-2019-cu illərdə Avropa İttifaqı Konsulluğun rəhbəri kimi Bağdaddakı fəaliyyətinə baxmaq yetərlidir. Deməli, "missiyanın" məqsədi Qərb kəşfiyyatının Ermənistandakı vəziyyətə nəzarət etmək istəyidir. Əgər iddia edildiyi kimi Aİ-nin missiyası sülhdə maraqlı olsaydı, İrəvanın sabitliyi pozmaq cəhdlərinin qarşısını alardı".
