Azərbaycan və Ermənistan arasında sülh müqaviləsinin imzalanması ilə bağlı danışıqlarda hələlik ciddi irəliləyiş yoxdur. Bu barədə Ermənistan Təhlükəsizlik Şurasının katibi Armen Qriqoryan jurnalistlərə açıqlamasında bildirib.
Qriqoryan qeyd edib ki, yeni nəsə olsa, ictimaiyyətə məlumat verəcəyik.
Onun sözlərinə görə, hazırda danışıqlar prosesi ilə bağlı əhəmiyyətli yenilik yoxdur və bu istiqamətdə ictimaiyyətə veriləcək əlavə məlumat mövcud deyil.
Sosial Tədqiqatlar Mərkəzinin sektor müdiri, politoloq Tural İsmayılov Sherg.az-a bildirib ki, Ermənistan Təhlükəsizlik Şurasının katibi Armen Qriqoryanın açıqlaması bir daha göstərdi ki, Ermənistan tərəfi sülh müqaviləsinin imzalanması istiqamətində real iradə nümayiş etdirmir:
“2020-ci ildəki müharibədən sonra regionda sabitliyin təmin olunması üçün açılmış pəncərəni Ermənistanın siyasi elitası sistemli şəkildə qapatmağa çalışır. Paşinyan hökumətinin ziddiyyətli bəyanatları və ardıcıl olmayan siyasəti həm daxili, həm də xarici arenada inamsızlıq doğurur. İrəvan rejimi populist ritorika ilə zaman qazanmağa çalışsa da, bu, Ermənistan üçün siyasi və iqtisadi fəlakətləri daha da yaxınlaşdırır. 2025-ci ilin ilk rübündə Ermənistan iqtisadiyyatı 3.1% daralmışdır ki, bu da son 7 ilin ən pis göstəricilərindən biridir. Xarici borcun ÜDM-ə nisbəti 64%-ə çataraq ölkənin maliyyə dayanıqlılığına ciddi zərbə vurur. Ermənistan dramı 2025-ci ilin mart ayına olan məlumata əsasən, dollar qarşısında 8.4% dəyər itirib. Dövlət büdcəsindəki 950 milyon dollarlıq kəsir, sosial proqramların ixtisarına səbəb olub. İşsizlik rəsmi statistikaya görə 15%-ə yaxınlaşır, amma real rəqəmlər daha yüksəkdir. İxracın əsasını təşkil edən metal və mədən sənayesində 18% azalma müşahidə olunub. Rusiyadakı erməni diasporunun pul köçürmələri 27% azalıb, bu da ölkənin valyuta axınına mənfi təsir göstərir”.
Ekspert qeyd edib ki, Ermənistan Avrasiya İqtisadi İttifaqı ilə münasibətlərdə də ziddiyyətli mövqe sərgilədiyi üçün Rusiyadan investisiya axını əhəmiyyətli dərəcədə azalıb:
“Avropa İttifaqı ilə yaxınlaşmaq cəhdləri isə siyasi bəyanatlardan o tərəfə keçmir. Enerji qiymətlərinin artımı inflyasiyanı 10% həddinə yaxınlaşdırıb, bu isə alıcılıq qabiliyyətini zəiflədir. Ermənistanın kənd təsərrüfatı sektoru bu il 9% daralıb, ölkədə ərzaq təhlükəsizliyi riski yaranıb. Xarici investorların etimad indeksi 2024-cü illə müqayisədə 33% azalıb. Paşinyan hökuməti ölkədəki iqtisadi disbalansı populist və qərarsız addımlarla gizlətməyə çalışır. Ermənistanın sülh müqaviləsindən yayınması, həm də regiondakı iqtisadi əməkdaşlıq imkanlarından kənarda qalmasına səbəb olur. Zəngəzur dəhlizinin açılmaması Ermənistanın regional tranzit qovşağı olmaq şansını məhv edir. Bakı-Tbilisi-Qars dəmir yolunun genişləndirilməsi fonunda Ermənistan daha da təcrid olunur. Bu təcrid özünü iqtisadi göstəricilərdə də göstərməkdədir. Ermənistan gənc əhalisinin 38%-i iş tapmaq üçün ölkəni tərk etməyə çalışır. Miqrasiya dalğası təhsil və səhiyyə kimi əsas sektorları da çökdürür. Ermənistan siyasi rəhbərliyi bu gedişlə həm beynəlxalq müttəfiqlərini, həm də xalqının ümidlərini itirəcək. Həmçinin Ermənistan regionda barışa töhfə verməzsə həm siyasi suverenliyini, həm də iqtisadi təhlükəsizliyini itirmək riski ilə üz-üzə qalacaq. Ermənistanın sülh müqaviləsindən yayınması təkcə Azərbaycanla münasibətlərə deyil, ölkənin gələcək iqtisadi sabitliyinə də təhlükə yaradır”.
