“Türkologiya” jurnalı heç vaxt çapını dayandırmayıb
Parlamentin dünənki iclasında deputat Siyavuş Novruzovun çıxışı həmkarı, AMEA prezidenti İsa Həbibbəylinin etirazına səbəb olub. Deputat S.Novruzov qeyd edib ki, elm sahəsində ciddi işlər görülməlidir. Parlament üzvü bildirib ki, elmdə türkologiya və Cənubi Azərbaycan sahəsi ciddi yer almalıdır: “Əvvəllər “Türkologiya” jurnalı var idi, indi o da yoxdur. Bu materiallar artırılmalıdır”. Onun sözlərinə görə, vətəndaşları narahat edən digər məsələ peşə sahəsində olan problemlərdir: “Bütün nazirliklər akademiya açır, peşə məktəbi açan yoxdur. Bizim böyük şəhərlərimizdə də peşə məktəbi çox azdır. Bu gün onların sayı çox olsa, gənclər heç institutlara getməz. Peşə texniki sahəsində məsələyə ciddi yanaşılmalı, hər struktura tapşırıq verilməlidir ki, bir peşə texniki məktəb açılsın”.
Deputat İsa Həbibbəyli isə Siyavuş Novruzova cavabında bildirib ki, “Türkologiya” jurnalı heç vaxt çapını dayandırmayıb: “Türkologiyanın inkişafını təmin etmək üçün “Türkoloji araşdırma” jurnalı da çap olunur. Bu jurnallar bütün türk ölkələrində yayılır. AMEA-da Cənubi Azərbaycanla bağlı 3 şöbə də fəaliyyət göstərir. Orada 30 nəfərə yaxın elmi işçi çalışır. Hər üç şöbənin fəaliyyətinin gücləndirilməsi Rəyasət Heyətində müzakirə olunub. Hər iki sahənin potensialı çoxdur və daha da artırılacaq”.
Sədr Sahibə Qafarova isə Siyavuş Novruzova təklif edib ki, Elm və təhsil komitəsinin iclaslarında tez-tez iştirak etsin ki, bu cür məlumatları əldə etsin.
