Yanvarın 26-sı Rusiyanın Azərbaycandakı səfiri Mixail Boçarnikov ötən ilin dekabr ayında Azərbaycan və Ermənistanın ictimaiyyət nümayəndələri arasında keçirilən görüşdən danışıb. O, 2022-ci ildə əlaqələrin davam etdirilməsi məsələsinin müzakirə edildiyini vurğulayıb. Səfir qeyd edib ki, növbəti görüşün dəqiq tarixi məlum deyil.
Onun sözlərinə görə, üçtərəfli işçi qrupunun fəaliyyəti ictimaiyyətə müsbət təsir göstərəcək. Xatırladaq ki, 2021-ci il dekabrın 23-24-də Moskvada iki ölkənin ictimaiyyət nümayəndələrinin ilk görüşü baş tutub. Görüşə Rusiya Prezidentinin beynəlxalq mədəni əməkdaşlıq üzrə xüsusi nümayəndəsi Mixail Şvıdkoy da qatılıb. Görüş iştirakçıları iki xalq arasında münasibətlərdə gərginliyin azalması tədbirlərini müzakirə edib. Həmçinin 2022-ci ilin əvvəllərində bu cür təmasların davam etdirilməsi barədə razılığa gəliblər.
Xalq diplomatiyasının önəmindən bəhs edən Azəri Türk Qadınları Birliyinin sədri Tənzilə Rüstəmxanlı "Sherg.az"a bildirib ki, müəyyən müddətdən sonra münasibətlərdə normallaşma prosesinə şahid olmağımız mümkün haldır:
“Tarix bizə göstərir ki, savaşlardan sonra sərhəd qonşuları istəməsələr belə birgə yaşamaq məcburiyyətindədirlər. Azərbaycanla Ermənistan da qonşu ölkələrdir. Xalq diplomatiyası iki ölkə əhalisi arasında münasibətlərə müsbət təsir etmə potensialındadır. Erməni ziyalıları xalq diplomatiyası missiyasını öz xalqlarının yaxşılığı üçün yerinə yetirməlidirlər. Onlar öz xalqına izah etməlidir ki, daimi düşmənçiliklə, kinlə yaşamaq olmaz. İki ölkə ziyalıları bir araya gəlib məsələnin həllinə mühüm töhfə verə bilərlər. Lakin Ermənistan təxribatlarına davam edərsə, danışıqlar prosesi nəticəsiz qalar”.
Xanlar ƏLİBƏY
