"Türkiyə və Azərbaycan mediası Güney məsələsində son dərəcə həssas və aktiv olmalıdır"
"Urmiya bizim üçün milli strateji əhəmiyyətli məsələdir".
Bu barədə "Sherg.az"a açıqlamasında siyasi şərhçi Rusif Məmmədsoy deyib.
Ekspert bildirib ki, Urmiya qədim türk torpağıdır və elə də qalacaq:
"Molla rejimi hər vəchlə, uzun illərdir çalışırdı ki, həmin bölgədə yaşayan təxminən milyon yarımlıq türk nüfuzunu bölgədən köçürsün, o yerlərə radikal kürd qruplarını yerləşdirsin. Bunun üçün çabaları da göz önündədir. İş imkanları minimuma endirilir, göl qurudulur və ekoloji fəlakət yaradaraq insanları məcburi köçünə şərait yaradılır və s. Urmiya Türkiyə ilə sərhəddə yerləşir. Türkiyənin PKK məsələsini çözməyə yaxınlaşdığı bir zamanda həm də Ankaraya mesaj verir ki, sərhədlərində PKK və uzantılarına meydan verə bilərəm. PJAK məsələsi də uzun illərdir yürüdülən bu siyasətin tərkib hissəsidir. Guya bu illər ərzində İran bu qruplarla silahlı toqquşmalar yaşayır və.s Hər biri cəfəngiyatdır. Bir neçə ay öncəyə qayıdaq. Türkiyənin İraqın şimalında başlatdığı "Pençe" əməliyyatları zamanı terrorçuları qova-qova Qandil dağına qədər gətirirdi. Daha sonra isə həmin dəstələr anidən yoxa çıxırdı. Əslində məsələnin mahiyyəti çox sadədir. Qandil dağının bir hissəsi İran ərazisinə düşür. Həmin dəstələr Qandil dağından İran tərəfə keçir, orda himayə edilir, müalicə alırlar. Bununla bağlı Türkiyə müdafiə naziri açıq şəkildə İrana etiraz da etmişdi".
Analitik qeyd edib ki, xülasə, İran PKK uzantılarına qarşı mübarizə aparmır:
"Onlara ciddi şəkildə dəstək verir və işbirliyi içərisindədir. Bütün bunlar azmış kimi İkinci Qarabağ savaşı başladığı ərəfədə SEPAH terrorçuları Xudafərin istiqamətində Qarabağ ərazisinə gətirib yığmışdı. Bunları sadalamaqla bitməz. Güney Azərbaycanda baş verən və ya verəcək hadisələr bizim üçün, qardaş Türkiyə üçün çox əhəmiyyətlidir. Doğrudur, nə Azərbaycan, nə də Türkiyə İrana yönəlik açıq müstəvidə reaksiya vermir, baş verənləri İranın daxili işi kimi qiymətləndirir, amma mən bu məsələdə bir qədər fərqli mövqenin tərəfdarıyam. Demirəm ki, açıq şəkildə mübarizə aparaq, lakin Türkiyə və Azərbaycan mediası Güney məsələsində son dərəcə həssas və aktiv olmalıdır. Hətta düşünürəm ki, Urmiya bizim üçün Zəngəzur qədər milli strateji əhəmiyyətli məsələdir. Bir əsr öncə Zəngəzurun Azərbaycandan alınaraq Ermənistana verilməsi ilə türk dünyasının ürəyinə bir xəncər sapladılar. İndi də eyni siyasət davam edir. Biz imkan verə bilmərik ki, eyni sözləri 1 əsr sonra Urmiya üçün deyək".
