Aprelin 9-u saat 23:50 radələrində Ermənistan silahlı qüvvələrinin bölmələri Tovuzqala rayonunun Müsüskənd yaşayış məntəqəsi istiqamətində yerləşən mövqelərindən Azərbaycan Ordusunun mövqelərini atıcı silahlardan atəşə tutub.
Bu barədə Azərbaycanın Müdafiə Nazirliyindən bildirilib.
"Bölmələrimiz tərəfindən qeyd olunan istiqamətdə adekvat cavab tədbirləri görülüb", - nazirlikdən əlavə olunub.
Türkiyənin Azərbaycandakı keçmiş hərbi attaşesi, ehtiyatda olan general-mayor Yücel Karauz "Sherg.az"a deyib ki, Ermənistanın niyyəti səmimi, dürüst və qərəzsiz iş birliyi deyil:
"10 noyabr Üçtərəfli Bəyanatından 54-55 ay keçməsinə baxmayaraq, rəsmi İrəvan sülh üçün səmimi addımlar atmır, mina xəritələrini verməkdən boyun qaçırır. Hələ də azərbaycan xalqı və əsgərlər işğaldan azad olunmuş ərazilərdə mina təhlükəsindən əziyyət çəkir. Ermənistan türk dünyasının, Azərbaycan-Türkiyə ilə bağlı beynəlxalq nüfuzun hər yüksəlişində, uğurlu fəaliyyətlərində müxtəlif cinayət və təxribatlar törədirlər. Prezident İlham Əliyevin ADA Universitetində keçirilən "Yeni dünya nizamına doğru" mövzusunda beynəlxalq forumda dünyaya verdiyi mesajlar Ermənistanı narahat edib. Azərbaycanın dövlət başçısının fikirləri ermənilərin yalanlarını, maskasını açıq-aşkar ortaya qoydu. Odur ki, bundan qıcıqlandıqları üçün növbəti gün sərhədləri atəşkəsi pozdular və təxribatlar törətdilər. Bu, xoşniyyətli davranış deyil".
Ekspert qeyd edib ki, Ermənistan zaman qazanmaq, silahlanmaq, o cümlədən qisas almaq üçün ortam yaratmaq istəyir:
"Buna görə də Azərbaycanı guya müharibə istəyirmiş kimi göstərmək üçün tələ qurmağa çalışırlar. Lakin rəsmi Bakı hər zaman onların mənfur niyyətini pozur. Digər tərəfdən Azərbaycanın da bir səbri, dözüm nöqtəsi var. Heç kim bunu zorlamamalıdır".
