Azərbaycanın müdafiə naziri Zakir Həsənov yanvarın 25-də İrana gedəcək. Səfər barəsində Azərbaycanın İrandakı səfiri Əli Əlizadə məlumat yayıb. "2022-ci il yaxşı başlayıb" - deyə səfir məlumatda qeyd edib.
Səfərin əhəmiyyətini "Sherg.az"a şərh edən politoloq Sədrəddin Soltan bildirib ki, Azərbaycanla-İran arasında ciddi hərbi əməkdaşlıq gözlənilmir:
"44 günlük müharibə dövründə İranın Azərbaycana qarşı mövqeyi müsbət deyildi. Lakin sonrakı diplomatik danışıqlar nəticəsində Tehran iki dövlət arasında hərbi sahədə əməkdaşlıq etmək istədiyini bildirmişdi.
Zənnimcə, müdafiə naziri Zakir Həsənov İranın təkliflərini dəyərləndirmək üçün İrana səfər edib. Bu, hərbi-diplomatik səfərdir. İran rəsmiləri ilə görüşlərin keçiriləcəyi güman edilir. Hansısa istiqamətdə əməkdaşlıq planlaşdırıla bilər.
Amma ciddi bir sənəd imzalanacağına inamım yoxdur.
Azərbaycanın İrandan silah almağı ehtimalı da azdır. İranın hansı silahları var ki Azərbaycan onu alsın? Azərbaycan ordusunun təchizatı, fəaliyyəti, taktikası, texnikası, hamısı NATO standartlarına uyğun qurulub, müasir hərbi tələblərə cavab verir".
Xanlar ƏLİBƏY
