ABŞ prezidenti Donald Tramp İranın raket qurğularını idarə edən kompüter şəbəkələrinə kiber hücumların təşkil olunması barədə əmr imzalayıb.
"The Washington Post” qəzeti 20 iyun tarixindən başlayan bu strategiyanın kiberkomandanlıq tərəfindən həftələr, hətta aylar öncəsindən hazırlandığını yazıb.
Qəzetin xəbərinə əsasən, Pentaqon Oman körfəzində iki neft tankerinə edilən hücumdan sonra işi sürətləndirməyə qərar verib.
"The Washington Post” hücumun İranın hərbi komandanlıq və idaərçilik sistemlərinə ciddi zərbə vurduğunu, lakin bunun insan ölümünə səbəb olmadığını bildirib.
Ağ Ev hələlik yayılan informasiyanı şərh etməkdən boyun qaçırıb.
ABŞ Müdafiə nazirliyinin mətbuat katibi Elissa Smit isə "Pentaqonun kəşfiyyat xarakterli əməliyyatlarını və kiberməkandakı planlarını mətbuatla müzakirə etməyəcəklərini” söyləyib.
Qeyd olunur ki, ABŞ-ın İran İslam Keşikçiləri Korpusuna yönəlik məxfi hücumu barədə ilk xəbəri "Yahoo News” yayıb. Portalın məlumatına əsasən bununla bağlı hazırlanan xüsusi qrup Hörmüz boğazından keçən hərbi və mülki gəmiləri fasiləsiz izləyib.
Bu arada ABŞ prezidenti Donald Tramp mətbuatda yayıldığı kimi, İrana hücum əmri barədə qərarını geri çəkmədiyini deyib.
"Mən medianın yalandan xəbər verdiyi üzrə İrana zərbə vurulmasını heç vaxt təxirə salmamışam. Sadəcə həmin məsələnin olduğu yerdən tərpənməsinə imkan verməmişəm”, - deyə Ağ Ev sahibi Twitter hesabında yazıb. (Musavat.com)
