"Artıq bu ildən etibarən abituriyentlərə ali məktəblərin bakalavriat pilləsinə qəbul imtahanlarında iki dəfə iştirak etmək şansı verilib. Bu, yalnız I, II, III, IV ixtisas qruplarına aiddir, V ixtisas qrupunun abituriyentlərinə aid deyil".
Bunu Lent.az-ın CANLI YAYIMINDA qonaq olan Dövlət İmtahan Mərkəzinin sektor müdiri Xanlar Xanlarzadə deyib.
Onun özlərinə görə, artıq bir neçə ildir qəbul imtahanları əvvəlki və cari ilin məzunları üçün ayrıca keçirilirdi.
Bəzən əvvəlki illərin məzunları müraciət edirdilər ki, bu ilin məzunları ilə birlikdə imtahanda iştirak eləsinlər. Bundan başqa hər bir imtahanın həyəcanı var. Bütün abituriyentləri üçün ikinci şansın yaranması faydalı addımdır. Ola bilər kimsə birinci imtahanda özünü toparlaya bilməsin, onun üçün ikinci şans yaradılır.
Burada əsas şərtlərdən də biri odur ki, abituriyentlər hər iki imtahanda eyni ixtisas qrupunu seçməlidirlər. Digər ixtisas qrupunu seçməyə icazə verilmir".
Xanlar Xanlarzadə imtahanların iki dəfə keçirilməsinin DİM-in maliyyə probləri ilə əlaqədar olması barədə səslənən fikirlərlə razılaşmayıb: "Bizim hər hansı maliyyə problemimiz yoxdur. TQDK mərkəzi icra hakimiyyəti orqanı idi və dövlət büdcəsindən vəsait ayrılırdı. DİM isə publik hüquqi şəxsdir, xidmət göstərən təşkilatdır. Bu imtahanlar ödənişlidir və sifariş əsasında olur. Ona görə də bu məsələni həər hansı maliyyə çətinliyi ilə əlaqələndirmək düz olmazdı".
