Bərdədə hamilə qadın dünyasını dəyişib. Qadının astma xəstəsi olduğu bildirilir. Məlumata görə, Rüstəmova Hicran Qənimət qızı qəfil boğulduğu üçün astma qəlyanından istifadə edib. Lakin qəlyanın ona heç bir faydası olmayıb.
H.Rüstəmovanın valideynləri isə qızlarının zəhərlənərək öldürüldüyünü iddia edirlər. Həkimlərin rəyinə görə, 6 aylıq hamilə olan gəlin xəstəliyi ilə bağlı olaraq kəskin böhran keçirib. Nəticədə xəstəliyin fəsadlarına tab gətirməyərək dünyasını dəyişib.
Astmadan əziyyət çəkən qadınlar üçün hamiləliyin ciddi risk faktoru olduğu danılmazdır. Əvvəllər ağır formada astma xəstəliyi olan qadınlara hamilə qalmaq tövsiyə edilmirdi. Müasir tibdə isə astma xəstəliyinin müalicə prinsipləri xeyli dəyişilib. Hazırda belə hesab olunur ki, astma xəstəliyi olan hamilə qadının problemi xəstəliyin mövcudluğu ilə deyil, bu xəstəliyə düzgün olmayan və ya kifayət etməyən nəzarətlə bağlıdır.
Hadisə ilə bağlı "Şərq”ə danışan həkim Şahvələd Məmmədov astma xəstəliyinin tutma və tutmadan sonrakı dövrlərinin olduğunu deyib. O bildirib ki, tutmadan qabaqkı dövr "aura dövrü” hesab olunur və bu zaman xəstə tənəffüs yollarında xırıltı əmələ gəldiyini hiss edir:
"Yəqin ki, qadında ağır tənəffüs çatışmazlığı olub. 6 aylıq hamilə qadının belə böhran keçirməsi təbii ki, çox çətin bir prosesdir. Görünür, baş verənlərdə müəyyən səhlənkarlıq olub. Xəstə tənəffüs yollarında yüngül ağırlıq hiss edən kimi mütləq həkimə müraciət etməli, ağır dərəcəyə gəlməməli idi.
Əgər qadın tutma dövründə dünyasını dəyişibsə, burda xəstə səhlənkarlığı da ola bilər. Bəzən xəstələr özləri məsuliyyətsizlik edirlər, vaxtında lazım olan müayinələrdən keçmirlər. Hər halda baş verənlər dəqiq araşdırıldıqdan sonra həkim, ya xəstə səhlənkarlığı olduğunu demək mümkündür”.
Yeganə Bayramova
