“Serialın rejissoru mənəm. Qərarı da mən verirəm. Kimi dəvət edəcəm, kim mənim filmimdə rol alacaq, bu mənim seçimimdi”
Ötən sayımızda əməkdar artist Kəmalə Müzəffərin "Vicdan haqqı” serialından getməsi ilə bağlı açıqlamasını oxucularımıza təqdim etdik. Aktrisanın açıqlamasından sonra rejissor Rövşən İsak reaksiya verib. "Şərq”ə danışan rejissor "Mənim telefonum bir neçə gündür susmur.
Bu məsələni niyə mətbuat bu qədər şişirdir? Türkiyədə onlarla serialda aktyorlar dəyişir. Bu, yaradıcı prosesdə normal bir işdi. Aktrisa ilə anlaşılmazlıq ola bilir, tərəflər arasında fikir mübahisəsi yarana bilər, iş birliyi bitər.
Dünyanın axırı deyil ki? Kəmalə xanım serialdan gedib yerinə bir başqa aktrisa gəlib. Niyə bu məsələni qazıb nə isə axtarmağa ehtiyac yaranır. Mən bunun anlamıram. Bu gün bir neçə mətbuat orqanına eyni açıqlamanı vermək məcburiyyətində qalmışam.
Dilarə obrazını canlandıran əvvəlki aktrisa ilə sözümüz alınmadı. Bu normaldı. İşbirliyini bitirdik, o da serialdan getdi. Kimin nə deməyi mənim üçün maraqlı deyil. Mən gedən aktrisa barədə də danışmaq istəmirəm. Allah işini avand eləsin.
O getdi, onu başqa aktrisa ilə əvəz etdik. Səmimi fikrimi bilmək istəyirsinizsə, mən o qadın barədə qətiyyən fikir bildirmək belə istəmirəm. Susmaq haqqım var. Serialın rejissoru mənəm. Qərarı da mən verirəm. Kimi dəvət edəcəm, kim mənim filmimdə rol alacaq, bu mənim seçimimdi. Mənə elə gəlir ki, serialın daha maraqlı, səliqəli və səviyyəli şəkildə davam etməsini təmin etmək üçün Dilarəni başqa aktrisa ilə əvəz etməyə ehtiyac duydum.
Mənim bu fikirlərimə də hörmətlə yanaşılmasını tələb edirəm. Əminəm ki, tamaşaçının marağı seriala azalmayıb. Kimsə o qadının getməsi ilə serialın baxımlı olmasına təsirini iddia edə bilər. Mən bu iddiaları qəbul etmirəm. Serialın da reytinqi göz önündədir”.
Tahirə
