"Ermənistanın işğal altında olan Talış kəndində bəzi simvolik tikinti işlərini aparması ilk növbədə "aprel döyüşlərində” uğursuzluqlarını kompensasiya etmək məqsədini güdür”.
Bunu "Şərq”ə açıqlamasında Vəhdət Partiyasının sədr müavini, politoloq Vasif Əfəndiyev deyib.
Son günlər erməni tərəfinin təxribatlarına, uydurma informasiyalarına münasibət bildirən ekspert vurğulayıb ki, Cocuq Mərcanlıda aparılan möhtəşəm quruculuq işləri və kəndin yenidən məskunlaşması ermənilərdə qorxu və həyəcan hissləri yaradıb:
"Talış kəndində quruculuq imitasiyasını edən Sarkisyan hökuməti guya ərazinin kontrolda olduğunu və bir də Azərbaycan tərəfindən hücum olmayacağını qarantiyaya almaq məqsədi daşıyır. Lakin Azərbaycan istənilən vaxt, məşhur deyimdə olduğu kimi, "gecənin bir anında” ildırım sürətli hücum edərək aprel ayında olduğu kimi düşmənə sarsıdıcı zərbə vura bilər. Bilirik ki, bu il Ermənistanda prezident seçkiləri keçiriləcək. Son iki ildə Sarkisyan hərbi və diplomatik sahədə böyük uğursuzluğa düçar oldu”. Politoloq bildirib ki, Dağlıq Qarabağda davam edən stabilliyin kövrək olması erməni ictimaiyyətini çox narahat edir: "Artıq Ermənistanda fərqli siyasi qüvvənin hakimiyyətə gəlməsinin qaçılmaz olduğu görünməkdədir. Sarkisyan bu ucuz kampaniya ilə təmsil olunduğu siyasi qruplaşmaya dividend gətirməyə çalışır. Lakin buna baxmayaraq, bu il Ermənistanda çox gərgin və təlatümlü siyasi proseslər gedəcək. Sarkisyan və onun təmsil olunduğu siyasi elitanın uğursuzluğa düçar olacağı şübhəsizdir”.
İsmayıl
