3 aylıq körpə dünyasını dəyişib. Körpənin valideynləri baş verən hadisədə həkimi günahlandırır.
Uşağın səhhətində problem olduğu üçün Səhiyyə Nazirliyi Respublika Uşaq Klinik Xəstəxanasına aparılıb. Körpənin babası Sərraf Əskərov uşaqda halsızlıq və iştahsızlıq olduğu üçün həkimə müraciət etdiklərini deyir:
"Əvvəl uşağı Ulturasəs müayinəsindən (USM) keçirdik, heç bir problemi olmadığını, dalağının, böyrəyinin və ciyərinin təmiz olduğunu dedilər. Dedilər ki, uşağın iştahı olmadığı üçün, bəlkə də, onda qan azlığı ola bilər. Amma uşağa yanlış qan köçürüblər”.
Baş verənlərlə bağlı fikirlərini "Sherg.az”la bölüşən Azərbaycan Demokrat Partiyasının sədri, həkim Sərdar Cəlaloğlu bildirib ki, tam araşdırma aparılmadan həkimi günahlandırmaq düzgün deyil:
"Bizdə "həkim səhvi” deyilən bir anlayış var. Amma həkimləri müəyyən səhlənkarlığa görə qınaya bilərik. Çünki həkimlər yalnız səhlənkarlığa görə məsuliyyət daşıylar, xəstəyə düzgün diaqnoz qoyulmamasına görə yox.
Vətəndaşın subyektiv fikirləri ilə həkimi ittiham etmək haqqı yoxdur. Baş verən hadisəyə səbəb kimi yanlış qan köçürmə olduğu sübut edilməlidir. Yalnız bundan sonra həkim səhlənkarlığının olub-olmaması ortaya çıxar.
Ola bilsin ki, körpəni həkimə çox gec gətiriblər və uşağın çətin diaqnoz qoyulan bir xəsətliyi var imiş. Həkim də əlində olan imkanlarla diaqnozu dəqiq müəyyənləşdirə bilmir və xəstə dünyasını dəyişir. Burada həkimin heç bir məsuliyyəti yoxdur. Hər şey konkret situasiyalarla bağlıdır. Ümumi şəkildə xəstə öldüsə, buna həkim səbəbkardır demək düzgün deyil”.
Həkim qeyd edib ki, Ümumdünya Səhiyyə Təşkilatı tərəfindən bəzi xəstəliklərin müəyyən edilmiş ölüm norması var:
"Məsələn elə xəsətliklər var ki, orada 99 faiz, eləsi də var ki, 1 faiz ölüm olur. Kimsə xərçəng xəstəsidirsə, bu cür hallarda ölüm halları 99 faizi təşkil edir. Həkim belə məqamda nə etməlidir ki? Ona görə də bu cür situasiyalarda əsasən meyid yoxlanmalıdır. Bundan sonra həkimin körpə ölümü ilə əlaqəsi olduğu müəyyən edilə bilər”.
Yeganə Bayramova
