"Çətin oldu, amma bacardıq, yeməyə hər cür ərzağımız var"
4 ay əvvəl bütün ev əşyalarını satıb 12 min TL pulla (1440 manat) İstanbuldan Muğlaya köçən Gökhan ailəsi kənd həyatının gözəlliyindən danışıb. “Şərq” “Milliyet.com”a istinadən xəbər verir ki, ailə şəhər həyatını tərk edib kəndə köçənləri internet üzərindən davamlı təqib edib. Nəhayət özləri də kəndə köç etmək qərarına gəlib. Ailə başçısı Gökcan Gökhan deyib ki, istəkləri, əslində karvan həyatı sürmək olub. Lakin 3 azyaşlı qızları üçün bu səyahətin çətinliyini gözə alaraq birdəfəlik kəndə köçməyə qərar veriblər. Ailə 4 ay əvvəl Muğlanın Ortaca bölgəsinə köç edib:
“Həyat yoldaşımı razı salmaq çox çətin oldu. Amma sonunda bacardıq”. Ailə İstanbuldakı ev əşyalarını tamamilə satışa çıxarıb və bundan sadəcə 12 min tl vəsait əldə edib. Muğlada internetdə görüb bəyəndikləri mənzildə qalmağı planlaşdırıblar. “Atamın mebel mağazasından bizə çatan gəlirimiz vardı. Sonra "You Tube" üçün videolar hazırlamağa başladıq. Hazırda gəlirimizin böyük hissəsi "You Tube" üzərindəndir. İşsizlik maaşım da var, onunla mənzil kirayəsini ödəyirik. Yaxın zamanda təbii kənd məhsullarının internet üzərindən satışını təşkil edəcəyik”, söyləyən Gökhan kiçik gəlirlə keçinə bildiklərini deyib.
Az yeyib, az xərcləyirlər. Kənddəki mənzilin kirayə haqqı çox baha olmadığından problem yaşamırlar. Ailənin üzləşdiyi problem təkcə Özlem Gökhanın işdən azad edilməsi olub. Bundan sonra ailənin gəlirlərini artırmaq barədə düşünməli olublar. Və təsərrüfatla, əkinçiliklə məşğul olmağa başlayıblar.
Evin bağçasında 9 portağal ağacı, 3-4 də limon və müxtəlif meyvə ağacları var. Bağçalarında tərəvəz əkən Gökhan ailəsi yetişdirdikləri məhsuldan özləri də istifadə edir, satışa da çıxarırlar. Gökcan deyir ki, İstanbulda 8-10 saat çalışırdı, yenə gəliri az idi, burda isə 2-3 saat çalışmaqla 10-15 min tl gəlir əldə edir.
Kənd həyatının az məsrəfli, çox gəlirli olduğunu deyən Gökhan Muğlaya köçmələrini düzgün qərar hesab edir: “Yaxşı ki, bura gəldik. 12 min tl ilə yola çıxdıq. İndi başımız üstə damımız, yeməyə hər cür ərzağımız var. Məhsulumuz artdıqca, internet üzərindən satışını həyata keçirib daha çox qazanc əldə edə bilərik. Kənddə yaşamaq asan deyil, amma xoşdur”.
