Avropa Komissiyası Azərbaycan təbii qazının Avropaya nəqlini nəzərdə tutan layihələrə maliyyə vəsaiti ayıracaq. Bu barədə Avropa Komissiyası məlumat yayıb. Bildirilib ki, Avropa Komissiyası Azərbaycan və Türkmənistan təbii qazının Gürcüstan və Türkiyədən keçməklə Avropa İttifaqı (Aİ) ölkələrinə nəqlini nəzərdə tutan Cənubi Qafqaz Boru Kəmərinin Genişləndirilməsi, Trans-Anadolu qaz boru kəməri (TANAP) və Transxəzər qaz kəməri layihələrinin həyata keçirilməsi məqsədilə ümumilikdə 1 milyon 871 min 725 avro maliyyə vəsaiti ayıracaq.
Məsələ ilə bağlı "Şərq”ə danışan "Altay” Strateji Araşdırmalar Mərkəzinin sədri, iqtisadçı Elçin Bayramlı deyib ki, istənilən halda Avropa Komissiyasının bu layihələrə vəsait ayırması müsbət haldır:
"Təbii ki, bu, daha çox həmin təşkilatların, Qərb ölkələrinin xeyrinədir. Onlar qaz mənbələrini və idxal kəmərlərini diversifikasiya edirlər ki, bu da həm daha ucuz qaz almalarına, həm də hər hansı bir mənbədən asılılıqlarını azaltmalarına səbəb olur. Azərbaycan və Türkmənistan üçün də təbii ki, belə layihələr faydalıdır. Lakin burada ayrılan vəsaitin məbləği düşündürücüdür.
Necə yəni 1,8 milyon, axı burada söhbət hansısa 3 mərtəbəli villanın tikilməsindən yox, minlərlə kilometr uzunluğu olan beynəlxalq qaz boru kəmərlərinin çəkilməsindən gedir. Bəlkə də məbləğlə bağlı məlumatda texniki səhv var. Ya da ola bilsin, layihənin tamamlanması üçün smetada çatışmayan kiçik vəsaiti kompensasiya edirlər. Bu baxımdan məlumat natamam yayılıb. Lakin yenə vurğulayıram, təkcə Transxəzər sualtı boru kəməri üçün milyardlarla vəsait lazımdır”.
İsmayıl
