Müdafiə Nazirliyinin mətbuat xidmətindən verilən məlumata görə, sentyabr ayının 17-də başlamış Azərbaycan ordusunun genişmiqyaslı təlimləri günün gecə saatlarında da keçirilib. Plana uyğun olaraq, müxtəlif poliqonlarda gecə vaxtı və məhdud görmə şəraitində döyüş atışları icra olunub. Təlimlərə cəlb olunan qoşunlar silahlanmada olan müasir silah və hərbi texnikanın tətbiqi ilə şərti düşmənin bütün hədəflərini məhv edərək, qarşıya qoyulan tapşırıqları yerinə yetiriblər.
Ekspertlərə görə, təlimlərin gecə şəraitində keçirilməsi və döyüş tapşırıqlarının qaranlıqda icra olunması Silahlı Qüvvələrin döyüş qabiliyyətini artırır. Nəzərə almaq lazımdır ki, düşmən tərəfin diversant qrupları əksər hallarda hərbi qüvvələrimizin mövqeyinə gecə saatlarında zərbə vurmağa cəhd göstərirlər.
Məsələni "Şərq”ə dəyərləndirən hərbi-ekspert Ramil Məmmədli deyib ki, Azərbaycan Ordusu istənilən saatda və hava şəraitində döyüş tapşırığını icra etməyi bacarmalıdır. Bu, ordumuzun qarşısına qoyulan mühüm tapşırıqlardan biridir:
"Azərbaycan Ordusu qarşısına çıxan çətin tapşırıqları peşəkarlıqla yerinə yetirmək üçün poliqonlarda bu istiqamətdə zəruri təlimlər keçirir. Döyüş əməliyyatlarının çox hissəsinin qaranlıq şəraitdə həyata keçirildiyini nəzərə alsaq, ordumuzun gecə saatlarında təlimlərinin nə qədər əhəmiyyətli olduğunu anlaya bilərik.
Digər tərəfdən düşmən mövqelərinə gecə saatlarında güclü zərbə endirmək üçün hərbçilərimiz bu bacarığı daha da təkmilləşdirməlidir. Bu baxımdan, ordumuzun bu bacarıqlarını təkmilləşdirməsini yüksək qiymətləndirirəm. Hesab edirəm ki, hərbi birləşmələrimiz bu çətin tapşırıqları döyüşdə qələbə ilə tamamlayacaq”.
İsmayıl
