Dünən Milli Məclisdə Azərbaycan parlamentinin 100 illiyi münasibətilə təntənəli iclas keçirilib. İclasda Azərbaycan Prezidenti İlham Əliyev nitq söyləyib.
Prezident Azərbaycan parlamentinin yaradılmasının 100 iliyi münasibətilə təbriklərini çatdıraraq bildirib ki, Azərbaycan Xalq Cümhuriyyətinin yaradılması tarixi hadisə idi: "Xalqımız Şərqdə ilk demokratik respublikanın yaradılması ilə fəxr edir”. Cümhuriyyət dövründə bir sıra dövlət atributlarının təsis edildiyini deyən Prezident Azərbaycan dövlətinin Cümhuriyyətin və onun qurucularının fəaliyyətini yüksək qiymətləndirdiyini vurğulayıb, bu il "Cümhuriyyət İli” çərçivəsində dövlət səviyyəsində bir sıra tədbirlərin keçirildiyini diqqətə çatdırıb: "1991-ci ildə, bir əsrdə ikinci dəfə müstəqilliyinə qovuşan Azərbaycanda ilk illərdə vəziyyət acınacaqlı idi. Ölkəmiz çətin sınaqlarla üz-üzə qalmışdı. O ağır vaxtlarda xalqımız müdriklik göstərərək, ümummilli lider Heydər Əliyevi hakimiyyətə dəvət etdi. Ulu öndərin respublikaya rəhbərliyindən sonra ölkədə önəmli addımlar atıldı, Azərbaycan tədricən ağır vəziyyətdən çıxdı. Bugünkü inkişafımızda Azərbaycan parlamentinin də payı var. Milli Məclis müstəqilliyimizi möhkəmləndirdi, ölkəmizin inkişafına öz töhfəsini verdi və bu, davam edir. Burada qəbul olunan qanunların həyatımızın bütün sahələrini əhatə etdiyini və bizim qanunvericilik bazamızın ən yüksək meyarlara cavab verdiyini deyən dövlət başçısı qeyd edib ki, parlament çoxpartiyalı sistemin təkmilləşdirilməsində önəmli rol oynayıb və milli maraqlar məsələsində deputatlarımız bir nöqtəyə vurur, vətənpərvərlik göstərərək dövlətin maraqlarını beynəlxalq səviyyədə müdafiə edirlər”. Deputatlarımızın beynəlxalq təşkilatlar çərçivəsində də fəal iş apardığını, Azərbaycan reallıqlarını dünyaya çatdırdığını qeyd edən prezident vurğulayıb ki, onların fəaliyyətinin əsas istiqamətini Ermənistan-Azərbaycan münaqişəsi ilə bağlı həqiqətlərin çatdırılması təşkil edir və bu işdə son illərdə bir sıra uğurlara nail olunub. Ermənistan-Azərbaycan münaqişəsindən danışarkən dövlət başçısı qeyd edib ki, işğal olunmuş torpaqlarda bütün infrastruktur dağıdılıb, milli sərvətimiz talan olunub, xalqımıza qarşı hərbi cinayət - Xocalı soyqırımı törədilib: "Ermənistan münaqişənin həlli ilə bağlı beynəlxalq təşkilatlar tərəfindən qəbul olunan qətnamələrə məhəl qoymur, işğalçılıq siyasətini davam etdirir. Baxmayaraq ki, münaqişənin yeganə həlli yolu Azərbaycanın ərazi bütövlüyünün təmin olunmasından keçir. Bununla bağlı Ermənistanın yeni rəhbərliyi öz siyasətində ciddi dəyişikliklər etməlidir. Azərbaycan öz prinsipial mövqeyindən geri dönməyəcək. Çünki Dağlıq Qarabağ əzəli və tarixi Azərbaycan torpağıdır və o, Azərbaycanın suverenliyindən kənarda heç bir status almayacaq”. Bu gün Azərbaycanın iştirakı olmadan bölgədə heç bir layihənin reallaşdırılmasının mümkün olmadığını, getdikcə ölkəmizin bütün sahələrdə gücünün artdığını, Azərbaycanın beynəlxalq səviyyədə, qonşu ölkələrlə uğurlu əlaqələr qurduğunu deyən dövlət başçısı qeyd edib ki, son 15 ildə iqtisadiyyatımız 3,2 dəfə artıb, Dünya İqtisadi Forumunun iqtisadiyyatın rəqabətqabiliyyətlilik hesabatına görə Azərbaycan dünya miqyasında 35-ci, inkişaf edən ölkələr arasında inklüziv inkişaf indeksinə görə 3-cü yerdə qərarlaşıb: "Beynəlxalq reytinqlərə görə, Azərbaycan Ordusu dünyada ən güclü 50 ordu sırasındadır. Bir neçə gündən sonra orbitə üçüncü süni peykimiz çıxarılacaq. Azərbaycanın təşəbbüsü ilə həyata keçirilən enerji və nəqliyyat layihələri var ki, bu çox önəmlidir. Bu layihələr ölkəmizin dünyadakı təhlükəsizliyinə mühüm töhfə verir”. Azərbaycanın multikulturalizmin mərkəzlərindən birinə çevrildiyini deyən prezident bundan sonra da ölkəmizin inkişafı ilə bağlı tədbirlərin görüləcəyini söyləyib. Bu gün Azərbaycanın dünya xəritəsində bir uğur nümunəsi olduğunu, ölkəmizin tam müstəqil siyasət yürütdüyünü deyən dövlət başçısı Azərbaycanın öz milli maraqlarını tam təmin etdiyini və Azərbaycan parlamentinin bu işdə mühüm rolunun olduğunu diqqətə çatdırıb.
Sonra Azərbaycan parlamentinin 100 illiyi münasibətilə təşkil olunan mərasimin iştirakçıları xatirə şəkli çəkdiriblər.
Anar
