"Ermənistan daxilində siyasi böhran dərinləşir”.
Bunu "Şərq”ə açıqlamasında politoloq Məhəmməd Əsədullazadə deyib. Düşmən ölkədəki vəziyyəti şərh edən ekspert bildirib ki, baş nazir Nikol Paşinyan "Qarabağ klanı”na qarşı yeni metodlarla mübarizəyə başlamaq üçün hərəkətə keçib:
"Hazırda Paşinyanın ordu sıralarında ona sadiq generallar yoxdur. Orduda generallar Koçaryan və Sarkisyanın sadiq adamlarıdır. Məhz həmin generallar sabiq prezidentlər tərəfindən bu rütbəyə gətiriliblər və dolayı yolla Rusiyanın Ermənistandakı "102-ci” hərbi bazasının təlimatı ilə hərəkət edirlər. Təbii ki, bu vəziyyət Paşinyan üçün arzuolunan deyil və proseslər onun əleyhinə işləyir”.
Analitikin sözlərinə görə, Rusiya və "Qarabağ klanı”nın əsas planı növbəti aylarda Paşinyan iqtidarını ciddi şəkildə zəiflətməkdir:
"Ona görə də Paşinyan orduda özünə sadiq generalititet formalaşdırmaq istəyir. Məhz bu məqsədlə 2016-cı il aprel döyüşlərində Serj Sarkisyan tərəfindən vəzifədən qovulan hərbiçiləri vəzifəyə qaytarır. Anti-Sarkisyan generallarına vəzifə verməklə öz tərəfdarlarını artırmağa çalışır. Vurulan keçmiş generalları Paşinyan bu məqsədlə ətrafına toplayır. Belə bir situasiyada isə cəbhədə ermənilərin təxribatı arta bilər. Ölkəmiz diplomatik və hərbi yolla hücuma keçməlidir”.
İsmayıl
