"İndi eskalasiya üçün heç bir əsas yoxdur. Ermənistan və Azərbaycan bir-birinin suverenliyini və ərazi bütövlüyünü tanıyıb".
Bu sözləri Ermənistan Baş naziri Nikol Paşinyan İctimai Televiziyaya müsahibəsində sərhəddəki gərginliklə bağlı sualı cavablandırarkən deyib.
O bildirib ki, əsl xəbər budur ki, sülh sazişinin mətni razılaşdırılıb və imzalanmasını gözləyir”.
Paşinyanın açıqlamasını şərh edən Milli Cəbhə Partiyasının sədr müavini, siyasi ekspert Məhəmməd Əsədullazadə "Sherg.az"a açıqlamasında Ermənistan tərəfinin son günlər Azərbaycanla şərti sərhəddə atəşkəsi mütəmadi pozduqlarını xatırladıb:
"Nikol Paşinyan özü də etiraf etdi ki, ölkənin müdafiə nazirinə atəşkəsi pozmamağı tapşırıb. Azərbaycanın adekvat və prinsipial mövqeyini görən Paşinyanın regional şərtlərin də Ermənistanın əleyhinə olduğunun fərqindədir. Bu səbəbdən praqmatik və sülhyönümlü açıqlamalar verir. 24 saat ərzində 3 dəfə açıqlama verən Paşinyan az qala İlham Əliyevə yalvarırdı ki, sülh mətninə imza atmağa hazıram. Artıq Ermənistan Baş naziri Minsk qrupunun buraxılması barədə danışıqlara başlamağa hazır olduğunu vurğulayıb. Azərbaycanın şərtlərini bir-bir yerinə yetirir. Gələn il Konustitusiyanın dəyişməsinə gedəcəyini qeyd etdi".
Ermənistan Baş nazirinin sülh müqaviləsinin bağlanmasına tələsdiyini vurğulayan siyasi ekspert bildirib ki, Azərbaycan isə heç yerə tələsmir:
"Paşinyan əvvəla Ermənistan Konstitutsiyasıda dəyişiklik etməlidir. Eyni zamanda Ermənistan Zəngəzur dəhlizinin açılmasını rəsmən elan etməlidir. Ermənistanın baş naziri beynəlxalq və regional geosiyasi gərginlik fonunda Türkiyə və Azərbaycanla münasibətləri normallaşdırmaq istəyir. Rusiyanın təzyiqləri artdıqca sülh müqaviləsinə imza atmağı səbrsizliklə gözləyir".
