Böyük ehtimalla Cozef Baydenlə Donald Trampın bir-birilə mübarizə aparacaqlarının şahidi olacağıq
ABŞ Prezidenti Cozef Baydenin reytinqi, ictimai dəstəyi xeyli aşağı düşüb. “Reuters” agentliyi və “Ipsos” sosiologiya xidmətinin keçirdiyi sorğunun nəticələrinə görə, Baydenin reytinqi 36 faizədək enib ki, bu da 9 aylıq prezidentlik dövründə ən aşağı göstərici deməkdir. Eyni zamanda, rəyi soruşulanların 59 faizi prezidentin fəaliyyətindən narazılığını dilə gətirib. Baydenin nüfuzu demokratlar arasında da aşağı düşüb. Ötən həftə bu göstərici 74 faiz olduğu halda, indi 69 faiz təşkil edib. Respublikaçıların isə yalnız 11 faizi prezidentin fəaliyyətini dəstəklədiyini bildirib. Ekspertlərə görə, 40 ilin ən yüksək səviyyəsinə çatan inflyasiya Cozef Baydenin populyarlığının azalmasına ciddi təsir göstərən amillərdən biridir.
Politoloq Azər Rəşidoğlu “Şərq”ə bildirib ki, 2024-cü il seçkilərində də böyük ehtimalla Cozef Baydenlə Donald Trampın bir-birilə mübarizə aparacaqlarının şahidi olacağıq. Bayden hazırda 79 yaşındadır. İki ildən sonra növbəti seçkilərə qatılanda artıq onun 81 yaşı olacaq:
“Onun növbəti dəfə seçilib-seçilməyəcəyinə gəldikdə, indidən bu barədə konkret nəsə demək çətindir. Lakin Ukrayna məsələsində tutduğu mövqe fonunda Rusiyanı küncə sıxmağı bacaracağı təqdirdə, Baydenin nüfuzunun yenidən yüksələcəyini gözləmək olar.
Digər tərəfdən, ABŞ tarixində prezident olan şəxsin ikinci dəfə namizəd olduğu təqdirdə, məğlub olması kimi hallar ancaq təsadüfi hallarda baş verib. Baydenin seçilmək şansı az deyil. ABŞ-ın liberal istiblişmenti Baydeni dəstəkləyir. Amma Baydenin sağlıq durumu onun yenidən seçilməsinə əngəl yarada bilər.
Bu müstəvidə seçkilərə qədər sağlıq durumunun daha da ağırlaşa biləcəyi istisna deyil. Bayden üçün ikinci problem Trampın yenidən namizəd olmaq istəyidir. Konqresə seçkilərdə respublikaçılar qələbə qazana bilərlər. Bu isə prezident kimi Baydenin tamamilə təzyiq altında qalması deməkdir”.
