Dünən axşam saatlarında metronun “Ulduz” stansiyasında relsin üzərinə düşərək xəsarət alan sərnişinin vəziyyəti açıqlanıb.
TƏBİB-dən bildirilib ki, yanvarın 7-də saat 22:44 radələrində 2007-ci il təvəllüdlü oğlan Sabunçu Tibb Mərkəzinə hospitalizasiya olunub:
“Baş-beynin travması diaqnozu ilə ona zəruri tibbi yardımlar göstərilib və dərhal əməliyyata alınıb. Hazırda müalicəsi Cərrahi reanimasiya şöbəsində davam etdirilir, vəziyyəti ağırdır”.
Avtosfer.az saytının baş redaktoru, nəqliyyat eksperti Elməddin Muradlı "Sherg.az”a bildirib ki, bir çox dünya ölkələrində metroda qatarla platforma arasında səddlər çəkilib:
“Metroda qatarla platforma arasında təhlükəsizlik səddlərinin çəkilməsi sərnişinlərin təhlükəsizliyi üçün çox məqsədəuyğun və faydalı bir tədbir olardı. Belə sədlər, sərnişinlərin platformaya düşməsini və ya relslərə yaxınlaşmasını əngəlləyərək müxtəlif qəza halları və xəsarətləri minimuma endirə bilər. Bu, həm də hər hansı bir qəza və ya fövqəladə vəziyyət zamanı sərnişinlərin daha asan şəkildə qorunmasına imkan verir. Bundan əlavə, təhlükəsizlik sədlərinin qurulması yalnız xəsarətlərin qarşısını almaqla kifayətlənmir, həm də sərnişinlərin ümumi rahatlığını artırır və metronun daha etibarlı olmasını təmin edir. Ümumiyyətlə metroda bir çox işlər görülməlidir. Sadəcə təhlükəsizlik səddlərinin çəkilməsinin problemlərini və faydalarını dərindən araşdırmaq lazımdır. Təbii ki, belə bir sistemin qurulması müəyyən maliyyə və infrastruktur xərcləri tələb edir, lakin insan həyatının qorunması baxımından, bu investisiyalar olduqca əhəmiyyətlidir. Əslində intihar xarakterli hadisələrin, təsadüfi yıxılmaların qarşısını almaq üçün bunu etmək olar”.
