Ağdam rayonunda yaşayan 17 yaşlı qız ana olub. Rayonun Quzanlı kənd sakini, 2004-cü il təvəllüdlü S.Quliyeva iyunun 23-də hamilə vəziyyətdə Gəncə şəhər doğum evinə gətirilib.Daxili İşlər Nazirliyi (DİN) hadisəyə münasibət bildirib. DİN-in mətbuat xidmətinin Bərdə regional qrupundan bildirilib ki, 17 yaşlı qızın uşaq dünyaya gətirməsi ilə bağlı Ağdam Rayon Polis Şöbəsinə (RPŞ) məlumat daxil olub. Məlumatla əlaqədar Ağdam RPŞ-də araşdırmalar davam etdirilir.
Hadisəni “Sherg.az”a dəyərləndirən yazıçı-jurnalist Türkan Turanın sözlərinə görə, 21-ci əsr olsa da, bu cür hallar davam edir:
“Pişik quyruğunu qovalayırmış kimi belə hadisələr durmadan təkrarlanır. Təəssüf ki, erkən yaşda nikah və ana olmaya heç bir şəkildə həll yolu tapılmır. İnsanlar özlərini inkişaf etdirmirlər. Bəzi ailələr evdən bir boğaz azalmasının hayındadırlar.
Problem yenə də dönür-dolaşır xəstə və çürük cəmiyyətin, ailələrin üzərində dayanır. “Filankəs qızını tez ərə verdi, qoy mən də verim” düşüncəsi ilə yaşayırlar. Pandemiyadır və toyların keçirilməsi məhdudlaşıb. Buna baxmayaraq, çoxları oğul evləndirib, qız ərə verməkdə israrlıdır. Son nəticədə bütün bunların acısını dünyaya gələcək uşaqlar çəkir.
Qız 17 yaşında ana olubsa, deməli, 15-16 yaşında ərə verilib. Qanunvericilikdə qızların ailə qurmaq yaşı 18-dir. Bu isə o deməkdir ki, ortada qeyri-qanuni evlilik ərsəyə gəlib.Cəmiyyətin ən böyük problemi erkən yaşda ərə verilən qızların dünyaya nikahsız uşaq gətirməkləridir. Sabahısı günü ayrılıq baş verirsə, aliment problemi yaşanır. Hazırda çox qadının aliment ala bilməməsinin səbəbi sırf nikahsız evlilikdir. 17 yaşında bir qız övladına nə verə bilər axı? Onsuz da bu yaşda qızın düşüncələri kasaddır. Dünyaya uşaq gətirməklə ana olunmur. Ana övladını hərtərəfli şəkildə böyüdə bilməlidir”.
