Bütün dünyanı bürümüş koronavirus pandemiyasının ölkəmizdə geniş yayılmasının qarşısının alınması istiqamətində Prezident İlham Əliyevin atdığı qətiyyətli addımlara, əhalinin sağlamlığının qorunması, rifahının yaxşılaşdırılması üçün gördüyü işlərə görə Azərbaycan vətəndaşlarından dövlətimizin başçısına minnətdarlıq məktubları gəlməkdə davam edir. Vətəndaşlarımız Prezident İlham Əliyevin göstərdiyi diqqət və qayğıdan razılıqlarını ifadə edirlər.
Ucar rayonunun Yuxarı Şilyan kəndindən Yaqub Yunisovun dövlət rəhbərinə məktubunda deyilir:
“Möhtərəm cənab Prezident, mən də Azərbaycan Respublikasının vətəndaşı olaraq xalqımıza qoşulur, dünyaya qənim kəsilən koronavirus pandemiyasına qarşı ölkəmizdə apardığınız hərtərəfli mübarizəyə görə Sizə dərin təşəkkürümü və ehtiramımı bildirirəm. Cənab Prezident, Azərbaycan xalqı Sizinlə fəxr edir. Çünki Siz həmişə xalqımızın firavan yaşaması üçün bütün qüvvə və bacarığınızı, zəngin biliyinizi sərf etmisiniz. İqtisadiyyatımızın, sosial həyatımızın, elmimizin, mədəniyyətimizin və ümumiyyətlə, bütün sahələrin inkişaf etməsi üçün böyük işlər görməklə yüksək göstəricilər əldə etmisiniz. Azərbaycanın dünya dövlətləri içərisində çox böyük nüfuzu vardır. Bu nüfuz məhz Sizin yeritdiyiniz uğurlu daxili və xarici siyasətin nəticəsidir. Allah Sizi qorusun!”.
