Bakıda vətəndaş Türkiyənin məşhur onlayn alış-veriş şirkəti olan "Trendyol"dan şikayətçidir.
Bu barədə o, sosial şəbəkədə məlumat verib.
İddialara görə, onun sifarişi yanlış gəlib.
"Ötən ayın 20-də "Trendyol" vasitəsilə notbuk sifariş vermişdim. Oktyabrın 4-də isə əvəzinə milçək dərmanı göndərilib. Həm karqo şirkəti, həm də "Trendyol"a dəfələrlə müraciət olunub, lakin təzminat ödənilmir"deyə vətəndaş bildirib.
Məsələ ilə bağlı “Sherg.az”a danışan marketoloq Nicat Manafov deyib ki, bu kimi hallarla qarşılaşmamaq üçün bağlama təhvil verilən yerdə və ya kuriyerin yanında açılmalıdır:
''Əks halda platforma və karqo şirkətinin dəymiş zərəri konpensasiya etməmə kimi bir haqqı var. Çünki sonradan bağlamanın içi dəyişdirilə bilər. Vətəndaşlar belə vəziyyətlərdə yalnız məhkəmə yolu ilə iş aça bilərlər. Həmçinin, müştəri özü xarici anbarla əlaqə yaradaraq bağlamasını açdırıb, məhsula baxa bilər. Bu xidmət zamanı xarici anbardakı əməkdaş məhsulu açır, şəklini və ya videosunu müştəriyə göndərir. Bu zaman müştəri bağlamanın qırıq, defektli olub-olmadığını görə bilir. Bağlama müştərinin bəyanından sonra birbaşa Azərbaycana göndərilir. Məhsul xarici anbara hansı formada təhvil verilibsə, o şəkildə də sistemə giriş olunur''.
