“Kimsə bunu düzgün anlamayıb, yuxarı mərtəbədən polisin başına nələrsə tökürsə, bu, həmin insanın səhvidir”
Polis öz fəaliyyətini ancaq vətəndaşın sağlamlığının qorunmasına istiqamətləndirib”
Ölkədə xüsusi karantin rejimi elan olunduğu gündən etibarən qayğıkeş həkimlərimlə yanaşı, polislərimiz də ön cəbhədə mübarizə aparırlar.
Onlar gecə-gündüz bilmədən, yorulmadan çalışır, insanların sağlamlığının keşiyində dururlar. Sosial şəbəkələrdə dəfələrlə yayılan görüntülərdə hüquq-mühafizə orqanları əməkdaşlarının yolu keçmək üçün vətəndaşa yardım etdiklərinin, ərzaq, o cümlədən çörək alıb mənzillərinə apardıqlarının şahidi oluruq. Bu, təkcə peşə fəaliyyətini layiqincə yerinə yetirmək deyil, həm də xeyirxahlıq nümunəsidir.
Keçmiş polis rəisi Mahmud Hacıyev “Sherg.az”a açıqlamasında bildirib ki, son aylar ən çox əziyyət çəkən məhz polislər oldu:
“Mən polislərin hətta səhiyyə işçilərindən daha çox yorulduğunu deyərdim. Polis öz fəaliyyətini ancaq vətəndaşın sağlamlığının qorunmasına istiqamətləndirib. Nazirlər Kabineti yanında Operativ Qərargah müəyyən karantin qaydaları hazırlayır. Həmin qaydaların icrasına nəzarət isə polislərə tapşırılır.
Polislər kimə nə deyir ki? Sadəcə insanları qanuna, qaydaya əməl etməyə çağırır. Əgər kimsə bunu düzgün anlamır, hüquq-mühafizə əməkdaşının əməyini qiymətləndirmək əvəzinə, onu təhqir edir, yuxarı mərtəbədən başına nələrsə tökürsə, bu, həmin insanın səhvi, intellektinin, dünyagörüşünün çatışmazlığıdır.
Hələ həmin adamlar şükür etsinlər ki, onlar inzibati xətalar məcəlləsi ilə məsuliyyətə cəlb olundular və sadəcə bir neçə sutka ilə cəzalandılar. Əslində dərinə gedəsi olsaq, bu əməldə cinayət tərkibinin olduğunu da görərik. Deməli, polis əməkdaşları yenə humanistlik göstərdilər”.
