Taksi fəaliyyətinə icazə üçün tələb olunan sənədlərdən biri də reysqabağı tibbi müayinə müqaviləsidir. “Avtomobil nəqliyyatı haqqında”, “Lisenziyalar və icazələr haqqında” qanunlara əsasən, taksi minik avtomobilləri ilə sərnişindaşıma fəaliyyəti göstərmək istəyən hüquqi şəxslər və ya fərdi sahibkarlar buraxılış vəsiqəsi, eyni zamanda nəqliyyat vasitələri üçün buraxılış kartı almalıdırlar.
Bu barədə Azərbaycan Yerüstü Nəqliyyat Agentliyindən “APA-Economics”in sorğusuna cavab olaraq bildirilib.
Qeyd olunub ki, Nazirlər Kabinetinin 71 nömrəli Qərarına əsasən Avtomobil nəqliyyatı ilə sərnişin və yük daşımalarını yerinə yetirən daşıyıcılar mülkiyyət, icarə və ya istifadəsində olan avtonəqliyyat vasitələrinin texniki vəziyyətinin reysqabağı yoxlanılmasını, sürücülərin isə reysqabağı tibbi müayinədən keçirməsini təmin etməlidirlər. Bundan başqaHüquqi şəxslər və ya fərdi sahibkarlar reysqabağı texniki müayinə ilə bağlı aidiyyəti üzrə qeydiyyatdan keçmiş texniki-təmir sahələri (nəqliyyat vasitələrinə texniki xidmət göstərən məntəqələr), sürcülərin tibbi müayinəsi üçün isə tibb müəssisələri ilə müvafiq qaydada müqavilə imzalaya bilərlər. Qeyd olunan şərait eyni zamanda daşıyıcı tərəfindən parklarda da yaradıla bilər: “Hüquqi şəxslər və ya fərdi sahibkarlar buraxılış vəsiqəsi və buraxılış kartına müraciət etdikdə tələb olunan sənədlərdən biri də reysqabağı tibbi müayinə müqaviləsidir. Sürücünün narkotik sərxoşluq vəziyyətinin, narkotik vasitələr və psixotrop maddələrdən istifadənin müəyyən edilməsi üçün aparılan tibbi müayinənin nəticəsi barədə məlumatlar, eyni zamanda xüsusi hazırlıq keçməsini təsdiq edən sənəd də təqdim etməlidir. Qeyd olunan sənədlər olmadığı təqdirdə daşıyıcılar icazəyə müraciət edə bilməyəcəklər”. Xatırladaq ki, bir neçə gün öncə Bakıda 5 ailə üzvünü öldürməkdə təqsirli bilinən Əhməd Əhmədovun narkotik maddə istifadəçisi və psixi xəstə olması ilə bağlı iddialar səsləndirilir. Həmin şəxsin taksi sürücüsü kimi də fəaliyyət göstərməsi cəmiyyətdə narahatçılığa səbəb olub və bu gündən bütün taksi sürücülərinin yenidən narkoloji testdən keçirilməsi barədə xəbərlər yayılıb.
Məsələ ilə bağlı "Sherg.az"a danışan nəqliyyat eksperti Aslan Əsədov bildirib ki, ailəsini qətlə yetirən 25 yaşlı gəncin davranışı cəmiyyət tərəfindən birmənalı qarşılanmayıb :
"Psixi durumu normal olmayan birinin taksi fəaliyyətini həyata keçirməsi sərnişinləri narahat edib. Bu tip insanlar kifayət qədərdir. Hazırda insanlar sözügedən hadisədən təsirlənib və taksilərə minməkdən çəkinirlər. Bütün taksi sürücülərinin narkoloji testdən keçirilmə prossesinə bir neçə ay öncə başlanılıb. Əsas məqsəd isə vətəndaşların təhlükəsiz şəraitdə səfərlərini təmin etməkdir. Təbii ki, bu nüans vacib elementdir. Dövlət qurumları tərəfindən bununla bağlı mütəmadi maarifləndirmə işlərinə başlanılıb. Xüsusən, DYP nəzarət mexanizmini gücləndirib. Ümid edirəm ki, yaxın zamanlarda tək taksi deyil, bütün sürücülərin narkoloji testlərdən keçirilməsi tələb olunacaq".
