“Qazinin sarğısını qonşu dəyişirsə, həmin ərazidə yaşayan səlahiyyətli şəxslərə hava da, su da haramdır”
“Vətən uğrundan canından keçənə və onun ailəsinə qarşı etinasızlığı nə Allah, nə döyüşənlərin ruhu, nə də normal vətəndaş götürər!”
Müəyyən iddialara görə, müxtəlif icra strukturları şəhid və qazi ailələrinə lazımi diqqət və qayğını göstərmir. Onların problemləri ilə maraqlanmır. “Ağ Partiya”nın sədri Tural Abbaslı da bu günlərdə “Reaksiya Tv”dəki çıxşında belə bir fikir səsləndirib.
O qeyd edib ki, bəzi rayonların icra hakimiyyətləri həmin kateqoriyadan olan insanlarla nəinki yaxından maraqlanmaq heç onları qapıdan içəri buraxmırlar. Əlbəttə, bizim kimisə ittiham etmək, günahlandırmaq fikrimiz yoxdur. Amma od olmayan yerdən nə vaxtdan tüstü çıxır?!
Klassik Xalq Cəbhəsi Partiyasının sədri Mirmahmud Mirəlioğlu da səslənən iddiaları təsdiqləyib. O, “Sherg.az” söyləyib ki, deyilənlər iddia yox, faktdır:
“Qarabağdakı anti-terror əməliyyatları ilə yanaşı, ölkə daxilində DTX həbsləri də bunu təsdiqləyir. Vətəndaşların narazılıqları elə çoxdur ki, adam bilmir hansından danışsın. Demirəm, hamısı doğrudur. Amma hamısı yalan da ola bilməz axı. Müdir işçinin maaşını vermir, “sənə kim demişdi ki, könüllü xidmətə get” deyə onu günahlandırır. Bu nə düşüncədir?! Bu nə yanaşmadır?!”.
M.Mirəlioğlunun fikrincə, belə adamlar müvafiq qaydada cəzalanmalıdırlar:
“Məhz şəhid və qazilərimizin hesabına biz indi qürurla, başımız dik gəzə bilirik. Onların qəhrəmanlıqları sayəsində Azərbaycan bayrağı dalğalanır. Deməli, şəhid və qazi ailələri üçün nə etsək də azdır.
Hər birimiz, o cümlədən müvafiq qurumlar həmin adamları qayğı, diqqət göstərməldirlər. Amma bunun əksini müşahidə edirik. Rayonlar əvvəllər şəhid, qazi sayına görə yarışırdılarsa, indi sanki “kim daha az qayğı göstərər” deyə düşünürlər.
Nə vaxtadək qazilər, şəhid ailələri daxmada yaşamalıdırlar? Bilirsiz, əgər qazinin sarğısını qonşu dəyişirsə, həmin ərazidə yaşayan səlahiyyətli şəxslərə hava da, su da haramdır. Şübhəsiz, hər işlə Prezident, Ali Baş Komandan məşğul ola bilməz və olmamalıdır. Sadəcə qanunlar işləməlidir.
Əks halda, nisgilli ananın göz yaşları cəmiyyəti məhv edəcək! Vətən uğrundan canından keçənə və onun ailəsinə qarşı etinasızlığı nə Allah, nə döyüşənlərin ruhu, nə də normal vətəndaş götürər!”.
