İranda, Qumda dini təhsil alanlar QMİ tərəfindən vəzifəyə təyin edilirdi
Dini Qurumlarla İş üzrə Dövlət Komitəsi məscidlərə təyinat alan din xadimlərinin təhsili ilə bağlı statistik məlumatları açıqlayıb. Dövlət Komitəsinin Dini təhsil şöbəsinin müdiri Elnarə Kərimova din xadimlərinin 131-nin ali dini, 46-sının isə orta ixtisas dini təhsil aldıqlarını bildirib. Onun sözlərinə görə, ölkə daxilində ali dini təhsil almış şəxslərin 99 nəfəri Bakı İslam Universiteti, 12-si Bakı Dövlət Universitetinin İlahiyyat fakültəsi, 8-i Azərbaycan İlahiyyat İnstitutu, 1-i Qafqaz Universitetinin məzunlarıdır. Orta ixtisas din təhsili almış şəxslərdən 17-si Əliabad İslam Kolleci, 14-ü Xosrov İslam mədrəsəsi, 8-i Şəbnəm İslam Kolleci, 7-si Şəki Pedaqoji Texnikumu, 1-i Lənkəran İslam Kollecini bitirib. Vəzifəyə təyin olunan din xadimlərindən 5-i Türkiyə (3 nəfər Ərciyəs Universiteti, 1 nəfər Marmara Universiteti, 1 nəfər Səlcuq Universiteti), 3-ü Rusiya Federasiyasının Dağıstan Respublikası (1 nəfər Buyraks Universiteti, 2 nəfər Dağıstan İslam Universiteti), 5-i İran İslam Respublikası (Əl-Mustafa Universiteti), 1-i Misirdə (Əl-Əzhər Universiteti) ali dini təhsil almış şəxslərdir".
Məscidlərə təyinat edilənlər arasında ölkə daxilində ali dini və orta ixtisas dini təhsil alanların əksəriyyət təşkil etməsi, bu sahədə əvvəllər mövcud olmuş vəziyyətin – xarici ölkələrdə dini təhsil alanların vəzifəyə daha çox təyinatında balansın ölkəmizin xeyrinə dəyişdiyini göstərir.
“Sherg.az”a açıqlama verən ilahiyyatçı Tural İrfan qeyd etdi ki, bu, müsbət haldır:
- Yerli tədris müəssisələrində dini təhsil almış kadrların məscidlərdə vəzifələrə təyinat alması əlbəttə, müsbət haldır. Son zamanlaradək Qafqaz Müsəlmanları İdarəsi ölkə daxilində dini təhsil almış şəxsləri vəzifəyə təyinatdan kənarda qoyurdu. İranda, Qumda dini təhsil alanlar QMİ tərəfindən vəzifəyə təyin edilirdi. Lakin DQİDK sağ olsun ki, bu mənfi tendensiyanın qarşısını aldı. Hələ də tam təmizlənməyib Qum təhsillilər məscidlərimizdən. Bölgələrdə işləyənlər var hələ. Bakı İslam Universiteti fəaliyyət göstərdiyi və məzunları olduğu halda QMİ onları işə qəbul etmirdi. Təsəvvür edin ki, Bakı İslam Universitetinin 3797 məzununun diplomu Təhsil Nazirliyi tərəfindən tanınmadı. Bu məzunlar bakalavr diplomu ilə elmi iş götürüb çalışa bilmədilər, Ali Attestasiya Komissiyası onların bakalavr diplomunu qəbul etmədi, onlara elmi iş verilmədi, bununla da elmi dərəcə almalarının qarşısı kəsildi. Həmin məzunlar artıq qocalıblar. Onların təhsil taleyi məhv edildi. Biz düz 5 il Allahşükür Paşazadənin qəbuluna düşməyə cəhd etdik ki, bəlkə bu problem həllini tapsın. Amma faydasız oldu. Onunla görüşə bilmədik. Bakı İslam Universiteti QMİ nəzdində fəaliyyət göstərirdi, QMİ sədri Allahşükür Paşazadə həll etməliydi bu problemi. Amma o, passivlik nümayiş etdirdi, çünki İranın axundlarının, müctəhidlərinin bura gəlib məscidlərə yerləşməsini istəyirdi. Sağ olsun Komitə ki dövlət qulluğuna imtahan vermiş dini təhsili olan şəxslərə yer ayırır, onları müxtəlif vəzifələrə cəlb edir. Bakı İslam Universitetinin məzunları üçünsə, hələ də yol açılmayıb. Onlar, sadəcə, məhv ediliblər. Ölkədə ali dini təhsil yüksək səviyyədə olmalıdır ki, kənardan gələnlərə möhtac qalmayaq.
