Qəbələ rayonunda yeniyetmənin ölümü ilə nəticələnən bədbəxt hadisə baş verib.
Bakupost.az xəbər verir ki, fevralın 1-i saat 22 radələrində Ağcabədi rayon sakini 2010-cu il təvəllüdlü Hüseyn Azər oğlu Hüseynov hovuzda boğulub.
Belə ki, ailəsi ilə Qəbələnin Vəndam qəsəbəsinə istirahətə gedən və kirayə evdə qalan Hüseyn ehtiyatsızlıqdan həyətdəki hovuza düşüb. Onun həyatını xilas etmək mümkün olmayıb.
Faktla bağlı araşdırma aparılır.
Əməyin mühafizəsi və texniki təhlükəsizlik məsələləri üzrə ekspert Orxan Musayev "Sherg.az"a bildirib ki, xüsusilə həyət evlərində olan hovuzlarda uşaqların boğulma təhlükəsi ilə üz-üzə qaldığı və yaxud boğulub həyatını itirməsi halları qeydə alınmaqdadır:
“Bu halların qarşısını almaq üçün uşaqlara mütləq nəzarət edilməli, hovuzda yalnız valideyn nəzarəti altında uşaqların istifadəsi təmin olunmalıdır. Həmçinin hovuzların tikintisi və layihələndirilməsi zamanı uşaqların istifadə etməsi üçün hovuzun müəyyən hissəsində yerlər təşkil olunmalıdır. Yəni ümumi istifadədən əlavə uşaqlar üçün təyin olunmuş yerlər hazırlanmalıdır. Uşaqlar yalnız onlar üçün təyin olunmuş və icazəli yerlərdən istifadə etməlidirlər. Həmin təyin olunmuş yerlərdə uşaqların boylarına uyğun yerlər ayrılmalıdır. Çünki uşaqların ümumi istifadə üçün nəzərdə tutulmuş hovuzlardan istifadə etməsi nəticəsində boğulma riski yüksək olur. Uşaqlar hovuzdan istifadə edərkən boğulmanın qarşısını almaq üçün xüsusi jiletlərdən istifadəsi təmin olunmalıdır. Boğulma zamanı ilkin müdaxilə, uşağı sudan çıxartmaq və xüsusi masaj hərəkətləri ilə ağciyərlərdən suyun boşalmasını təmin etmək olmalıdır. Ondan sonrakı mərhələdə mütləq ilkin tibbi yardımın göstərilməsi üçün təcili tibbi yardım xidmətinə müraciət edilməlidir. Bir daha qeyd etmək lazımdır ki, həyət evlərində, hansı ki, hovuzlar təşkil olunub, orada uşaqların hovuzdan nəzarətsiz istifadə etməməsi üçün valideynlər tərəfindən mütləq tədbirlər görülməlidir. Digər tərəfdən uşaqlar təhlükəni tam dərk edə bilməsələr belə, valideynlər bu barədə uşaqlarla maarifləndirici söhbətlər aparmalıdırlar. Hovuzda, dənizdə üzmənin insan həyatı üçün hansı təhlükələr aşılaya biləcəyini uşağa bildirməlidirlər. Həmçinin uşaqlarla bununla bağlı psixoloji söhbətlər aparılmalı və mövcud boğulma halları ilə bağlı video roliklər göstərilməlidir”.
