Bu cəhdinə görə ermənilər bir gün ona dərin minnətdarlıq edəcəklər
Ermənistanda "Daşnaksütyun" partiyasının gənclər təşkilatının üzvlərinin evlərində axtarışlar aparılıb. Onların hamısı Ermənistanın İstintaq İdarəsinə aparılıb.
Bu barədə parlamentdəki müxalif "Ermənistan" fraksiyasının deputatı Artur Xaçatryan bildirib.
Deputat deyib ki, o, partiyanın üzvü Geqam Manukyanın evində keçirilən axtarış zamanı orada olub və onun oğlu Taron Manukyanın saxlanılmasının şahidi olub.
"Hüquq-mühafizə orqanlarının əməkdaşları deputatın və onun oğlunun telefonlarını, eləcə də bir neçə şəxsi əşyasını müsadirə etdilər",- o qeyd edib.
Artur Xaçatryan sözlərinə görə, partiyanın gənclər birliyinin daha 4-5 üzvü də İstintaq İdarəsinə aparılıb.
Siyasi şərhçi Azər Həsrət “Sher.az”a bildirib ki, “Daşnaksütyun” partiyası terorçu təşkilatdır:
“Ermənilərin bütün bəlalarının başında kilsə ilə bərabər, “Daşnaksütyun” partiyası da dayanır. Partiya 19-cu əsrin sonlarında Rusiyanın və Qərbin dəstəyi ilə qurulub. Partiyanın üzvləri sonrakı mərhələrdə də boş dayanmadılar və teror əməllərini davam etdirdilər. Hətta erməni xalqına böyük əzablar yaşatdılar. Çünki onların teror əməlləri nəticəsində ermənilər, xüsusilə qonşuları olan Azərbaycan və Türkiyə kimi dövlətlərlə qarşı-qarşıya dururdu. Bu gün Paşinyan öz ölkəsini normal dövlətə çevirmək istəyir. Bunun üçün də “Daşnaksütyun” kimi ünsürləri təmizləməklə məşğuldur. Ona görə də istər “Daşnaksütyun", istərsə də kilsə nümayəndələri ilə bağlı araşdırmalar aparılır. Onlar sözdə xalq, millət, dövlət maraqları desələr də, özləri xirtəyə kimi korrupsiyaya bulaşıblar. Dedikləri ilə etdikləri üst-üstə düşmür. Paşinyan isə bir növ bunları faş etməklə məşğuldur. Əslində bunu seçki öncəsi təmizləmək kimi də dəyərləndirirlər. Amma bu təkcə seçki öncəsi təmizləmə deyil, həm də erməni millətini xilasetmə cəhdidir. Bu cəhdinə görə ermənilər bir gün ona dərin minnətdarlıq edəcəklər”.
Siyasi şərhçinin sözlərinə görə, Paşinyan çalışır ki, erməni xalqı qonşularla-türklərlə normal münasibətlər müstəvisinə çıxsın:
“Bu çalışmaların qarşısında da əsas əngəl kilsə və “Daşnaksütyun” partiyasıdır. Onları təmizləmək günün tələbidir. Üstəlik də, bu hadisələrin , həm də Paşinyanın BƏƏ-də Prezident İlham Əliyevlə görüşdüyü anlarda baş verməsi əlavə qeyd edilməlidir. Yəni Baş nazir prosesi bir an belə dayandırmaq fikrində deyil. Bu mənada Paşinyan böyük qətiyyətlilik nümayiş etdirir. Elə erməni xalqının xilası da bu qətiyyətlilikdən asılı olacaq”.
Kəmalə Vəliyeva
