Ermənistan Baş naziri Nikol Paşinyan Ermənistan, Azərbaycan və Amerika Birləşmiş Ştatlarının imzaladığı üçtərəfli bəyannaməyə uyğun olaraq Azərbaycanın əsas hissəsi ilə Naxçıvan arasında Ermənistan ərazisindən kommunikasiyanın təşkili üçün hansı prosedur və prinsiplərdən istifadə ediləcəyi ilə bağlı sualı cavablandırıb.
Teleqraf xəbər verir ki, bu əlaqənin təmin edilməsi prosesində Ermənistan ərazisindən keçən insanların məlumatlarının Ermənistanın dövlət orqanlarına və sərhədçilərinə açıq olub-olmayacağı sualına cavab verən Nikol Paşinyan vəziyyətin düzgün qiymətləndirilməsinə çağırış edib.
“Mən bunu niyə deyirəm? Çünki hazırda imzalanmış sənədlər mövcuddur. Ümumi layihə ilə bağlı başqa heç bir sənəd və ya razılaşma yoxdur”, - baş nazir bildirib.
Paşinyan Ermənistan, Azərbaycan və ABŞ-nin imzaladığı bəyannamənin üçüncü bəndinə istinad edib:
“Biz regionda və onun qonşuluğunda sülh, sabitlik və rifahı təşviq etmək məqsədilə dövlətlərin suverenliyinə, ərazi bütövlüyünə və yurisdiksiyasına hörmət əsasında daxili, ikitərəfli və beynəlxalq daşımalar üçün iki ölkə arasında kommunikasiyaların açılmasının vacibliyini bir daha təsdiq etdik. Bu səylərə Ermənistan ərazisi vasitəsilə Azərbaycan Respublikasının əsas hissəsi ilə Naxçıvan Muxtar Respublikası arasında maneəsiz əlaqə daxildir”.
