Ermənistan parlamentinin sədri Alen Simonyan brifinqdə dünən Milli Məclisdə hökumətin sual-cavab sessiyası zamanı yaranan gərginliyə toxunub.
Teleqraf xəbər verir ki, o, baş verənlərə görə Baş nazir Nikol Paşinyanın müxalifət nümayəndələrindən üzr istəməyəcəyini deyib.
“Müxalifət üzr istəməlidir, çünki bütün bunlar müxalifətin həyasız davranışının nəticəsidir. Siz zaldakı gərginliyi hiss etmirsinizmi? Əvvəlcə sözünüzü kəsirlər, sonra “sən” rejimində, sonra yalan danışmağa, sonra tək-tək, ardınca da kollektiv şəkildə qışqırmağa başlayırlar.
İnsanlarla ünsiyyətdə olanda məndən soruşurlar ki, Alen, bütün bunlara necə dözürsən? Nə qədər gərginlik olduğundan xəbəriniz yoxdur. Baş nazir də, mən də - hamımız insanıq və bir yerə qədər çatan səbrimiz var. haqlı olan baş nazir idi”, - Simonyan bildirib.
Spiker Ermənistan parlamentindəki müxalif deputatları “oğru və korrupsioner” adlandırıb. Həmçinin o, müxalifətin üzr tələblərini yersiz hesab edib.
Xatırladaq ki, dünən Milli Məclisdə sessiya zamanı Nikol Paşinyanın müxalif “Ermənistan” fraksiyasının deputatı Anna Qriqoryanın korrupsiya ilə bağlı sualını cavablandırarkən vəziyyət gərginləşib.
Çıxışı zamanı müxalifətdən olan deputatların aqressiv çıxışlarına cavab verən Ermənistan baş naziri əli ilə Qriqoryanın boyunu göstərərək deyib: “Bura qədər gəlib çatmısınız”.
Parlamentin bugünkü iclasında isə Nikol Paşinyan müxalifət nümayəndələrinin IQ-sünün aşağı olduğuna eyham vurub: “Əgər boyunuz qısadırsa, sizi işə götürən biz deyilik, amma bu iş üçün IQ-nüzün olub-olmadığını da soruşmuruq”.
