Gürcüstanda NATO-nun “Agile Spirit 2025” (“Çevik ruh” ) adlı çoxmillətli beynəlxalq hərbi təlimləri başlayıb.
Teleqraf-ın yerli bürosu xəbər verir ki, bu barədə ölkənin Müdafiə Nazirliyindən bildirilib.
Təlimlərin rəsmi açılış mərasimi Tbilisi yaxınlığındakı NATO-Gürcüstan Birgə Təlim və Qiymətləndirmə Mərkəzində keçirilib.
“Agile Spirit 2025”ə Gürcüstan, ABŞ, Türkiyə, Polşa, Almaniya, İtaliya, Yunanıstan, Moldova, Rumıniya, Bolqarıstan, Slovakiya, Litva və Ukraynadan olan hərbçilər qatılıblar. Ermənistan və Yaponiyanın Silahlı Qüvvələrinin nümayəndələri təlimlərdə müşahidəçi qismində iştirak edirlər.
Təlimlər bölgənin iki ölkəsində - Gürcüstan və Türkiyədə keçirilir ki, bu da regional tərəfdaşlığın möhkəmləndirilməsinə töhfə verir.
Avqustun 6-dək davam edəcək “Agile Spirit 2025” təliminin məqsədi iştirakçı ölkələrin müdafiə qüvvələrinin hazırlıq səviyyəsini, qarşılıqlı fəaliyyət qabiliyyətini və əməliyyat imkanlarını artırmaqdır.
