“ABŞ-nin hazırkı administrasiyası öz sələfinin Gürcüstana münasibətdə səhvlərini düzəltmək üçün heç bir iş görməyib. Haqsız yerə tətbiq edilən sanksiyalar hələ də qüvvədədir və bizim münasibətləri təmiz səhifədən başlamaqla bağlı müraciətimiz cavabsız qalır”.
Teleqraf-ın yerli bürosu xəbər verir ki, bunu Gürcüstanın hakim “Gürcü Arzusu” partiyasının sədri, Baş nazir İrakli Kobaxidze keçirdiyi brifinqdə deyib.
O bildirib ki, Gürcüstan ABŞ Prezidenti Donald Trampa seçkiqabağı əsas vədlərindən birini yerinə yetirməsini və “dərin dövlət”i məhv etməsini bir daha arzulayır.
“Lakin biz şübhə edirik ki, bu mübarizə “dərin dövlət”in məğlubiyyəti ilə deyil, onun rebrendinqi ilə nəticələnəcək və məqsədi ABŞ tərəfində olmaqla Avropanı Rusiya-Ukrayna müharibəsinə cəlb etmək olacaq. Bu, eyni zamanda həm Avropa, həm də Rusiyanı məhv edəcək”.
Xatırladaq ki, ABŞ-nin əvvəlki administrasiyası Gürcüstanla strateji tərəfdaşlığı ötən ilin noyabrın 30-da dayandırıb. İ.Kobaxidze bu ilin mayında D.Trampa və ABŞ-nin vitse-prezident Ceyms Devid Vensə açıq məktubla müraciət edib. Məktubda Gürcüstan hökumətinin ABŞ ilə strateji tərəfdaşlığın təmiz səhifədən və konkret yol xəritəsi ilə yeniləməyə hazırlığı bildirilib.
