Bizim diqqətimiz hərbi təxribatlara yönəlib, amma dünyada daha yetkin taktika və metodologiya var.
Bunu erməni siyasi şərhçi Akop Badalyan yazıb.
O bildirib ki, hazırda Ermənistan iqtisadiyyatı hücum altındadır:
“Bu gün Zəngəzur zavodu ətrafında baş verənlər getdikcə daha çox Ermənistana hibrid hücum təəssüratını yaradır. Bu hücumda zavodun yüzlərlə əməkdaşının səmimi niyyət və emosiyalarından istifadə edilir.
Ermənistan hər gün yüz milyon dram itirir və müəssisə 400 milyona yaxın itkiyə məruz qalıb. İndi təsəvvür edək ki, Ermənistan bu həftə ərzində itirdiyi 700 milyon dramla nə qədər mühüm layihələr həyata keçirə bilərdi”.
A.Badalyan Ermənistanın xaos içində olan iqtisadi-sosial vəziyyətindən yaranan Zəngəzur zavodu böhranını Azərbaycan və Türkiyənin “hibrid hücumu” kimi təqdim etməyə çalışıb.
Qeyd edək ki, bir qədər əvvəl Zəngəzur mis-molibden zavodunda işçilər əməkhaqqının 50% artırılması tələbi ilə tətil ediblər. Aksiyalar zamanı işçilər arasında silahlı insident olub, 10 nəfər saxlanılıb.
Cross Media Təhlil Mərkəzinin analitiki, siyasi şərhçi Mübariz Göyüşlü "Sherg.az"a deyib ki, təkcə erməni şərhçiləri deyil, ümumiyyətlə dövlət səviyyəsində Paşinyan administrasiyası anti-azərbaycan təbliğatı aparırlar:
"Ermənistan nümayəndələrinin bütün fikirləri Azərbaycan haqqında Ermənistan daxilində və beynəlxalq aləmdə mənfi rəy formalaşdırmağa hesablanıb. Yalandan publikaya işləyən məlumatlar verirlər ki, guya Azərbaycan və Türkiyə ilə münasibətləri normallaşdırmaq, o cümlədən sülh sazişi imzalamaq istəyirlər. Bütün bunlar sözdədir. Lakin əməldə Paşinyan hakimiyyətinin beynəlxalq miqyasda anti-azərbaycan, anti-türkiyə çıxışları və çağırışlarının şahidi oluruq. Digər tərəfdən cəmiyyəti və dövləti bu cür təhlükəli situasiyalara sürükləmək və Azərbaycana qarşı kökləmək üçün əllərindən gələni etmək Ermənistan üçün zərərli addımdır. Çünki rəsmi İrəvanın durumu göz önündədir. Paşinyan və onun komandası bunu nə qədər tez başa düşüb yola gələrlərsə, onlar üçün daha faydalı olar. Əks təqdirdə məhz iki ölkə arasında və Cənubi Qafqazda vəziyyəti gərginləşəcək".
