İndi Azərbaycan və Ermənistan arasında de-fakto sülh var.
Teleqraf xəbər verir ki, bunu Ermənistanın Baş naziri Nikol Paşinyan Amerika Birləşmiş Ştatlarına (ABŞ) səfəri zamanı bu ölkənin “Fox News” telekanalına müsahibəsində deyib.
“İndi bizdə de-fakto sülh var. Ortaq investisiya layihələri həyata keçirmək, iqtisadi əməkdaşlıq etmək vaxtıdır. ABŞ-nin iştirakı bu hekayəni potensial investorlar üçün daha da cəlbedici edəcək”, - o söyləyib.
Paşinyan kommunikasiyaların açılması ilə bağlı razılaşmanı sülhün əldə olunması istiqamətində irəliləyiş adlandırıb. O, sözügedən razılaşmanın ərazi bütövlüyü, suverenlik, yurisdiksiya, qarşılıqlı və beynəlxalq səviyyədə tanınmış sərhədlər prinsiplərinə əsaslandığını qeyd edib.
Nikol Paşinyan Vaşinqtonda imzalanmış Birgə Bəyannamənin münasibətlərin normalaşması üçün zəmin yaratdığını, bununla belə hər iki liderin onilliklər boyu davam edən düşmənçiliyin bir gecədə yox olmayacağını dərk etdiyini söyləyib.
“Hər şeyi bir gün, bir həftə və ya hətta bir il ərzində dəyişmək mümkün deyil. Amma bu sənəd (Birgə Bəyannamə - red.), nə istədiyimizin bariz ifadəsidir. Hər iki lider - həm Prezident Əliyev, həm də mən bu vəziyyəti dəyişmək istəyirik”, - o deyib.
Paşinyan Ermənistanın yeni konstitusiyasının hazırlanması üzərində iş aparıldığını sözlərinə əlavə edib.
