Gürcüstan yalnız Rusiya imperializminə qarşı deyil, həm də Qərb imperializminə qarşı öz müstəqil siyasətini yürütməlidir
ABŞ Nümayəndələr Palatası Gürcüstan hakimiyyətinin əleyhinə olan qanun layihəsinə dəstək ifadə edib.
349 konqresmen “Megobari Act” adlandırılan sənədin lehinə səs verib, onlardan 168-i respublikaçı, 181-i isə demokratdır.
Qanun layihəsinin əleyhinə isə 42 konqresmen səs verib, daha 42 nəfər isə səsvermədə iştirak etməyib.
Akt Gürcüstanın yüksək vəzifəli şəxslərinə qarşı sanksiyalar və viza məhdudiyyətlərinin tətbiqini nəzərdə tutur. Sənəddə, həmçinin yardım proqramları da daxil olmaqla ABŞ-Gürcüstan münasibətlərinin yenidən dəyərləndirilməsi, gürcü xalqının avroatlantik inteqrasiyasına dəstəyin tanınması, “Gürcü Arzusu” partiyasının nümayəndələrinə qarşı sanksiyaların tətbiqini ABŞ prezidentinin öhdəsinə qoymaq, gürcü xalqı ilə əlaqələri və müdafiə sahəsində əməkdaşlığı möhkəmləndirmək, Gürcüstanın ərazi bütövlüyü və suvenerliyinə dəstəyin təsdiqlənməsi, vətəndaş cəmiyyətinin dəstəklənməsi müddəaları da yer alıb.
Nümayəndələr Palatasından sonra qanun layihəsinə Senatda baxılmalı və səsverməyə qoyulmalıdır. Hər iki palatanın təsdiqləyəcəyi halda sənəd ABŞ prezidentinə imzalanmağa təqdim olunacaq.
Qeyd edək ki, Tbilisi-Vaşinqton münasibətlərində böhran ötən ilin noyabrından hökm sürür. ABŞ noyabrın 30-da Gürcüstanla strateji tərəfdaşlığı dayandırıb. Ağ Evin yeni rəhbərliyi Gürcüstanla bağlı mövqeyini rəsmi olaraq hələ açıqlamayıb.
Politoloq Əhəd Məmmədli Sherg.az-a deyib ki, “Gürcü Arzusu” partiyasının Rusiya ilə münasibətləri normallaşdırmaq istiqamətində atdığı addımlar, Ukraynaya qarşı sanksiyalara qoşulmaması, enerji suverenliyini qorumağa çalışması və balanslı siyasət yürütməsi – son dövrlərdə Qərbdən gələn ciddi tənqidlərə səbəb oldu:
"Bütün bu proseslər fonunda Gürcüstana qarşı təzyiqlərin artmasını təsadüfi hesab etmirəm. Ukraynanın hazırkı ağır vəziyyəti Gürcüstan üçün ciddi bir dərs oldu. Gürcüstan bu hadisələrdən nəticə çıxararaq eyni taleyi yaşamaq istəmir. Nəzərə almaq lazımdır ki, Gürcüstanın Rusiya ilə 1000 kilometrlik bir sərhədi var və ərazi bütövlüyünün 20 faizi artıq separat qrupların nəzarətindədir. Rusiya həmin bölgələrin müstəqilliyini tanıyıb. Belə bir vəziyyətdə Gürcüstan Ukraynanın etibar etdiyi vədlərə inanaraq daha da mürəkkəb bir duruma düşməməlidir. Postsovet dövründən bu yana formalaşmış bir stereotip var ki, guya müstəqilliyimizi yalnız Rusiyadan qorumalıyıq. Halbuki, bu yanaşma birtərəflidir. Əslində, özünə hörmət edən hər bir dövlət suverenliyini bütün xarici təsirlərdən – istər Şərqdən, istərsə də Qərbdən qorumağa borcludur.
Avropa İttifaqına inteqrasiya və ya NATO-ya üzvlük uğrunda Gürcüstan öz dəyərlərindən, milli kimliyindən və ənənələrindən imtina etməməlidir. Amorf vədlərə əsaslanaraq addımlar atmaq təhlükəlidir. 2008-ci ildə ABŞ Prezidenti Corc Buş Tiflisə gəldi, simvolik jestlər göstərdi, lakin həmin ilin avqustunda Rusiya tankları Tiflisin cəmi 20 kilometrliyinə qədər irəlilədi. Bu, Gürcüstanın yaddaşında acı təcrübə kimi qalıb".
Politoloq qeyd edib ki, bu gün ABŞ-da Gürcüstan hakimiyyətinin əleyhinə olan qanun layihəsi Tiflis üçün açıq-aşkar bir təzyiq vasitəsidir:
"Məqsəd, Gürcüstanın Moskva ilə münasibətləri normallaşdırmasının qarşısını almaqdır. Gürcüstan yalnız Rusiya imperializminə qarşı deyil, həm də Qərb imperializminə qarşı öz müstəqil siyasətini yürütməlidir. Gürcüstan bu prosesdə balanslı siyasət apararaq Azərbaycan və Türkiyə kimi regional tərəfdaşlarla əlaqələrini yüksək səviyyədə saxlamaqla, həm təhlükəsizlik, həm də iqtisadi sabitlik baxımından önəmli üstünlüklər əldə edə bilər".
