Azərbaycan və Gürcüstan Ermənistanı da yedəyinə alaraq bu prosesi uğurla davam etdirə bilər
Ötən gün Tbilisidə Azərbaycan, Gürcüstan və Ermənistanın xarici işlər nazirlərinin müavinləri səviyyəsində üçtərəfli görüşün keçirilməsi Cənubi Qafqazda yeni dönəmin başladığını göstərir. Görüşə Gürcüstan tərəfi ev sahibliyi və moderatorluq etsə də, görüşün əsas təşəbbüskarı Azərbaycan olub. Gürcüstan Prezidenti Mixeil Kavelaşvilinin ölkəmizə ilk rəsmi səfəri çərçivəsində Prezident İlham Əliyev vurğuladı ki, uzun illər ərzində Cənubi Qafqaz münaqişə, müharibə arenasına çevrilib. Lakin Cənubi Qafqazda sülhün, əmin-amanlığın bərqərar edilməsi bizim birgə maraqlarımızda olan məsələdir və burada həm Gürcüstan, həm də Azərbaycan öz töhfəsini verir. Dövlət başçısı onu da qeyd etdi ki, bundan sonra Cənubi Qafqazın qara səhifələri bağlanacaq və tarixdə qalacaq. Gürcüstan rəhbəri Mixeil Kavelaşvili də öz növbəsində bölgədə dialoq və dayanıqlı sülh mühitinin bərqərar olunmasının Cənubi Qafqazın gələcək inkişafı üçün vacib olduğunu vurğuladı. Ancaq çox təəssüf ki, Ermənistanın yürütdüyü destruktiv və təcavüzkar siyasət üzündən son 33 ildə Cənubi Qafqaz birlik və həmrəylik bölgəsi kimi yox, potensial münaqişə ocağı kimi daim gündəmdə olub.
Politoloq Əlisahib Hüseynov "Sherg.az"a deyib ki, Azərbaycan 44 günlük müharibədən sonra "3+3" formatında regional əməkdaşlıq modelini təklif edib. Ekspert bildirib ki, rəsmi Bakı "3+3" formatına paralel, üç Cənubi Qafqaz ölkəsinin dialoqu əsasında “Qafqaz evi”nin yaradılması ideyasını da gündəmə gətirir:
"Təbii ki, ilk növbədə Ermənistan özünün ənənəvi destruktiv siyasətindən əl çəksin. Ermənistanın dağıdıcı siyasəti olmasa, “Qafqaz evi”ni yaratmaq mümkündür. Bu mənada, ötən gün Tbilisidə baş tutan üç ölkənin xarici işlər nazirlərinin müavinlərinin görüşünü “Qafqaz evi”nin yaradılması istiqamətində atılan ilk kövrək addım hesab etmək olar. Nəzərə almalıyıq ki, Cənubi Qafqaz mühüm strateji əhəmiyyət kəsb edən regiondur və üçtərəfli əməkdaşlıq son dərəcə zəruridir. Tbilisidə qapalı formatda keçirilən görüşün məqsədi regionun sabitliyi naminə üç ölkənin ümumi maraqlarını və fikirlərini bölüşmək, təklif və ideyaları birlikdə müzakirə etməkdir. Üçlü görüşdə mümkün əməkdaşlıq istiqamətləri nəzərdən keçirilib ki, region ölkələri gələcəkdə bir sıra məsələlərə münasibətdə birgə yanaşmaları inkişaf etdirə bilsinlər".
Ə.Hüseynovun qənaətincə, üçtərəfli görüşlərin keçirilməsinin davamlı xarakter alması zəruridir:
"Üç ölkənin baxış və fikirlərini bölüşmək üçün növbəti görüşlərin keçirilməsi vacibdir. Əsas odur ki, "Qafqaz evi"nin ideyadan gerçəkliyə çevrilməsi üçün ilk addım atıldı. Azərbaycan və Gürcüstan Ermənistanı da yedəyinə alaraq bu prosesi uğurla davam etdirə bilər. Kənar müdaxilələri neytrallaşdırmaq da öz iradəmizdən asılıdır. Bölgənin strateji rolu və potensialı pozitiv düşünməyimizə əsas verir. Cənubi Qafqaz üçün yeni dönəm başlayır. Aparıcı ölkə missiyası isə Azərbaycanın üzərinə düşür".
