Ermənistan tərəfi Overçukla danışıqlarda manipulyasiya edib, yola salacaq
Rusiyanın baş nazirinin müavini Aleksey Overçuk yaxın günlərdə Ermənistana gedəcək. Bu barədə Overçuk özü bildirib. Baş nazirin müavininin sözlərinə görə, o, Ermənistanın Avrasiya İqtisadi İttifaqındakı (Aİİ) işini müzakirə edəcək: "Səfər əvvəlcədən planlaşdırılıb və Ermənistan Respublikasının normativ-hüquqi bazasında normativ-hüquqi aktın, Ermənistan hökumətinin qərarının meydana çıxması ilə bağlıdır ki, bu da fikrimizcə, Avrasiya İqtisadi İttifaqının hüquq normalarına ziddir". Overçukun İrəvandan sonra Bakıya gələcəyi və müzakirələr aparacağı deyilir. Qeyd edək ki, Ermənistan, Rusiya və Azərbaycan baş nazirlərinin müavinləri - Mher Qriqoryan, Aleksey Overçuk və Şahin Mustafayevin həmsədrliyi ilə regionda kommunikasiyaların açılması üzrə üçtərəfli işçi qrupunun sonuncu iclası 2 iyun 2023-cü il tarixində Rusiya paytaxtında baş tutub.
Politoloq Məhəmməd Əsədullazadə Sherg.az-a deyib ki, Overçukun səfəri zamanı nəqliyyat və kommunikasiya yollarının açılması müzakirə ediləcək. Ekspertin sözlərinə görə, Rusiya ABŞ-də imzalanmış üçtərəfli razılaşmadan sonra hərəkətə keçib: "Rusiya baş nazirinin müavini A.Overçuk 2020-ci ildə imzalanmış üçtərəfli Birgə Bəyannamənin qüvvədə olduğu, həmçinin Rusiya, Azərbaycan və Ermənistan Baş nazirlərinin müavini səviyyəsində Komissiyasının işinin davam etdiyi görüntüsünü yaradır:
"Rusiyanın iştirakı ilə üçtərəfli Birgə Bəyannamə qüvvədən düşüb. Eyni zamanda, üçtərəfli komissiya da işlək deyil. Çünki ABŞ-də imzalanan sənədlər Rusiya ilə üçtərəfli razılaşmaların üzərindən xətt çəkdi. Overçuk yenidən Rusiyanın vasitəçiliyini irəli sürməklə prosesi dayandırmaq və ABŞ-nin prosesdə iştirakının qarşısını almaq niyyəti güdür. Overçuk Azərbaycana gəlib nəyi müzakirə edəcək?! Azərbaycanla Ermənistan ikitərəfli şəkildə nəqliyyat və kommunikasiya əlaqələrinin açılmasını həyata keçirə bilər. Onsuz da tərəflər arasında ikitərəfli danışıqlar aparılır. Üçüncü ölkənin vasitəçiliyinə ehtiyac yoxdur. Ona görə də Rusiya Baş nazirinin müavinini Bakıda qəbul etməyə ehtiyac yoxdur. Ermənistan tərəfi də Overçukla danışıqlarda manipulyasiya edib, yola salacaq. Demək olar ki, regionda Rusiyanın vasitəçiliyi sıfırlanıb. İrəvan və Bakı prosesi ikitərəfli şəkildə aparır. O baxımdan ABŞ proseslerdə aktiv olmalı və Rusiyanın Zəngəzur dəhlizi ilə bağlı hərəkətliliyinin qarşısını almalıdır".
