“Xəzər beşliyi” (Rusiya, Azərbaycan, İran, Qazaxıstan və Türkmənistan) iqtisadiyyat və mədəniyyət sahəsində əməkdaşlığı inkişaf etdirmək üçün böyük potensiala malikdir”.
Teleqraf xəbər verir ki, bunu Rusiya Xarici İşlər Nazirliyinin rəsmi nümayəndəsi Mariya Zaxarova deyib.
Diplomat Həştərxan şəhərində keçirilən Xəzər Media Forumunun iştirakçılarına videomüraciətində bildirib: “Bu gün Xəzər dənizi iqtisadi, ticarət, mədəni, humanitar və digər əlaqələrin bütün spektri üzrə geniş əməkdaşlıq sahəsini təmsil edir”.
Zaxarovanın sözlərinə görə, region ölkələrinin qarşısında duran bir çox məsələlər, problemlər və çağırışlar var - su hövzəsinin dayazlaşmasından və kövrək ekologiyasının qorunub saxlanmasından tutmuş, onun tranzit-nəqliyyat potensialının həyata keçirilməsinə qədər:
“Bütün bunlar “Xəzər beşliyi” çərçivəsində əməkdaşlığın daha da dərinləşdirilməsi zərurətini diktə edir”.
Zaxarova bu xüsusda Rusiya xarici işlər naziri Sergey Lavrovun “Xəzər əməkdaşlığı yaxşı sürət qazanıb və yeni zirvələrə çatır” və “Xəzərdə qarşılıqlı fəaliyyətin genişləndirilməsi beş ölkənin regionları arasında əməkdaşlığın gücləndirilməsinə kömək etmək məqsədi daşıyır” sözlərini xatırladıb.
“Bütün bu müddət ərzində əldə edilmiş regionlararası əməkdaşlıq təcrübəsi son dərəcə vacib və faydalıdır”, - diplomat söyləyib.
Rusiya rəsmisi əlavə edib ki, xarici qüvvələrin Xəzər regionunun işlərinə müdaxiləsi yolverilməzdir:
“Xəzər problemlərinin uğurlu həlli onların “beşlik” tərəfindən həllinin əsas prinsipidir. Bu, Xəzəryanı dövlətlərin birgə çiçəklənməsinin qarantıdır. Digər vacib şərt Xəzərin işlərinə kənar müdaxilənin qarşısının alınmasıdır”.
Zaxarova iddia edib ki, Xəzər dənizi həmişə bir çox xarici güclər üçün arzuolunan olub.
Onun sözlərinə görə, Xəzər regionunda sülhün təməl daşı Xəzər dənizinin hüquqi statusu haqqında 2018-ci il konvensiyasıdır: “Bu sənəd Xəzər dənizi ilə bağlı məsələlərin həllində yalnız beş Xəzəryanı dövlətin müstəsna səlahiyyətə malik olması barədə razılaşmanı qeyd edir.
Keçmişdə region ölkələrinin rəhbərlərinin müdrikliyi bu dənizi bizim ümumi evimizə çevirməyə imkan verib. Bu xətti saxlamaqda davam etmək vacibdir”.
