Rusiyanın üzərinə öhdəlik götürməsi iddiası inandırıcı görünmür
Rusiya Ermənistanın Hindistandan aldığı silahları çatdırmaqdan imtina edib. Bu barədə Ermənistanın "Respublika Partiyası"nın sədri Aram Sarqsyan deyib. Onun sözlərinə görə, İran Hindistan silahlarının böyük hissəsini artıq Ermənistana çatdırıb. Həmçinin qeyd olunub ki, Ermənistanın Rusiyadan silah alınması üçün ödəniş etdiyi 400-600 milyon dollar vəsaitin əvəzində nə silahlar çatdırılıb, nə də pul qaytarılıb.
Siyasi şərhçi Qabil Hüseynli Sherg.az bildirib ki, Hindistandan Ermənistana silah daşınması barədə Rusiyanın üzərinə öhdəlik götürməsi iddiası inandırıcı görünmür. Ekspertin fikrincə, Ermənistanı silahlandırma məsələsi ilə hazırda İran məşğul olur:
"Hindistandan Ermənistana silah-sursat gətirilməsi məsələsi İranla razılaşdırılıb. Tehran bunu böyük həvəslə icra edib. Rusiyanın Ermənistana borcunun olması iddiası da absurddur. Ermənistan sulah-sursata görə Rusiyaya milyardlarla dollar borcludur. İrəvanın Moskvaya borcunun sadəcə az bir hissəsinin əvəzi olaraq Ermənistandakı müəssisələr rus iş adamlarına icarəyə verilib. Ermənilərin Rusiyanı qınamağa haqqı yoxdur. 1991-ci ildən bu yana Rusiyanın kredit, bağışlama və s. adlarla Ermənistana verdiyi silahların dəyərinin həcmi 8,5 milyard dollardır. Yəni əslində, İrəvan Moskvaya borcludur".
