ABŞ Prezidenti Donald Tramp, Los Angelesdəki etiraz aksiyalarını yatırmaq üçün Milli Qvardiyanın göndərilməsini müdafiə edərək, “Əgər biz hərəkət etməsəydik, hadisələr qiyama çevrilə bilərdi” deyib və vətəndaş müharibəsi istəmədiyini bildirib.
Sherg.az xəbər verir ki, Tramp, Milli Qvardiyanın rolunu yüksək qiymətləndirərək, Kaliforniya qubernatoru Gavin Newsomun onu “vətəndaş müharibəsi yaratmaqda” ittiham edən açıqlamalarına da cavab verib:
“Mən vətəndaş müharibəsi başlatmıram, sadəcə qanunu tətbiq edirəm. Newsom isə bu böyük ştatı məhv edir.”
"Reuters"ə danışan ABŞ rəsmisi, əraziyə Milli Qvardiya çatana qədər 700 dəniz piyadasının Los Angelesə müvəqqəti göndərildiyini, lakin hələlik Üsyan Qanununun tətbiq edilmədiyini bildirib.
Los Angeles meri Karen Bass isə şəhərdəki gərginliyin 6 iyun tarixində keçirilən miqrantlara qarşı reydlərdən sonra başladığını, Trampın isə əslində bu böhranı özü yaratdığını vurğulayıb.
ICE qarşıtı etirazlarda çoxsaylı aksiyaçılar saxlanılıb, bəzi yerlərdə təhlükəsizlik qüvvələri ilə toqquşmalar baş verib. ABŞ Prezidenti Trump, Demokrat rəhbərləri ittiham edərək, Los Angeles-də vəziyyəti nəzarət altına almaq üçün Milli Qvardiyanı əraziyə göndərdiyini açıqlayıb.
