Türkiyənin Bitlisin Adilcevaz rayonunda yerləşən və bir çox quş növünə ev sahibliyi edən Arin gölü, son illərdə təsirini artıran quraqlıq səbəbindən təhlükəli vəziyyətə düşüb.
Quş cənnəti kimi tanınan bu gölün su səviyyəsinin sürətlə azalması həm ekosistem, həm də bölgə əhalisi üçün narahatlıq mənbəyinə çevrilib.
Van Gölünün şimalında yerləşən Arin gölü, miqrasiya edən quşların məskunlaşma və çoxalma ərazilərindən biri kimi tanınır.
Lakin qlobal iqlim dəyişikliyi və bölgədəki yağıntı çatışmazlığı səbəbindən göldə açıq şəkildə geri çəkilmə müşahidə olunur. Gölün bəzi hissələri tamamilə quruyub, torpaq səthində yaranan çatlar quraqlığın simvoluna çevrilib.
Bölgə sakinlərindən Suat Erçetin bildirib:
“Uşaqlığımızda göl bu qədər çəkilməmişdi. İndi baxanda görürük ki, piyada keçilə biləcək qədər sahələr quruyub. Quşlar da əvvəlki qədər gəlmir.”
