Polşa Prezidenti Karol Navrotski ölkəsinin təhlükəsizliyi üçün tələb olunarsa, Rusiya Prezidenti Vladimir Putinlə danışıqlar masası arxasına oturmağa hazır olduğunu bəyan edib.
Oxu.Az-ın xəbərinə görə, bu barədə Navrotski "Radio Zet" radiostansiyasının efirində çıxışı zamanı bəhs edib.
"Əlbəttə ki, mən Polşanın maraqları naminə hər şeyi etməyə hazıram", - deyə Navrotski bildirib.
Polşa lideri, həmçinin ABŞ Prezidenti Donald Trampın Qərbdə Rusiya lideri ilə danışıqlar apara biləcək yeganə insan olduğuna inandığını növbəti dəfə qeyd edib.
Karol Navrotski, həmçinin marşal Yozef Pilsudskinin (1918-22-ci illərdə RSFSR-dən müstəqillik əldə etmiş Polşa dövlətinin ilk rəhbəri) ruhu ilə müntəzəm olaraq söhbətləşdiyini də etiraf edib.
"Bəli, biz çox tez-tez, praktiki olaraq hər gün bir-birimizlə söhbət edirik. Mövzular çoxdur - 1920-ci il Polşa-sovet müharibəsi, Ukraynada müharibə başlayandan sonra beynəlxalq arenada mövcud vəziyyət, eləcə də parlamentdən də danışırıq", - deyə o qeyd edib.
Bundan əlavə, Polşa lideri vurğulayıb ki, bugünkü Polşanın Pilsudski və Papa II İohann Pavel kimi xadimlərə çox ehtiyacı var.
