Azərbaycan xarici işlər naziri Ceyhun Bayramov ölkəmizdə səfərdə olan Estoniya Respublikasının xarici işlər naziri Marqus Tsahkna ilə görüşüb. Nazirlə qonaq arasında baş tutan təkbətək görüş, daha sonra hər iki tərəfin nümayəndə heyətlərinin iştirakı ilə geniş tərkibdə davam edib. Görüşlərdə Azərbaycan-Estoniya ikitərəfli və çoxtərəfli əməkdaşlıq gündəliyində yer alan aktual məsələlər, habelə regional və qlobal məsələlər müzakirə edilib.
Ölkələrimiz arasında siyasi dialoqun və qarşılıqlı səfərlərin davam etdirilməsi, hüquq-müqavilə bazasının gücləndirilməsi və eləcə də parlamentlərarası təmasların intensivləşdirilməsi imkanları xüsusunda fikir mübadiləsi aparılıb. BMT, ATƏT və Avropa İttifaqı təsisatları çərçivəsində ölkələrimizin legitim maraqlarına hörmət və qarşılıqlı dəstəyin əhəmiyyəti vurğulanıb. Bu çərçivədə, əməkdaşlıq əlaqələri nəzərdən keçirilib. Azərbaycan və Estoniya arasında iqtisadi əməkdaşlığın inkişaf perspektivlərinə toxunulub, qarşılıqlı ticarət və investisiyaların artırılması üçün böyük potensialın mövcud olduğu bildirilib. Ölkələrimiz arasında təhsil sahəsində əməkdaşlıq əlaqələrinin vacibliyi vurğulanıb. Rəqəmsal iqtisadiyyat, bərpa olunan enerji və bağlantılar sahələrində əməkdaşlığın tam potensialından faydalanmaq üçün ticarət-iqtisadi əməkdaşlıq üzrə Azərbaycan-Estoniya Hökumətlərarası Komissiyanın fəaliyyətinin aktivləşdirilməsinin əhəmiyyəti qeyd olunub. Azərbaycanın işğaldan azad edilmiş ərazilərində həyata keçirilən genişmiqyaslı bərpa və yenidənqurma işləri barədə danışılıb. Görüş zamanı nazir Ceyhun Bayramov həmkarına Azərbaycan-Ermənistan normallaşma prosesi barədə son inkişaflar barədə məlumat verib, bu çərçivədə, Vaşinqton Zirvəsinin nəticələri və sülh müqaviləsinin paraflanmasının tarixi əhəmiyyəti qeyd edilib. Regionda daimi sülhün bərqərar edilməsi və sülh müqaviləsinin imzalanması üçün Ermənistan konstitusiyasından ölkəmizə qarşı ərazi iddialarının çıxarılmasının zəruriliyi vurğulanıb. Görüşlərdən sonra birgə mətbuat konfransı təşkil edilib, nazirlər görüşlərin nəticələrinə dair bəyanatlarla çıxış ediblər. Estoniya XİN başçısı bu yaxınlarda Bakıda səfirliyin açılacağını söyləyib. Qonaq paytaxt gəzintisinə də çıxıb, Zəfər Parkını, Şəhidlər Xiyabanını ziyarət edib.
Politoloq Məhəmməd Əsədullazadə Sherg.az-a deyib ki, Estoniya ilə Azərbaycan arasında hələ SSRİ dövründən müəyyən əlaqələr qurulmuşdu. Amma ekspert vurğulayıb ki, müstəqillik dövründə Estoniya-Azərbaycan əlaqələri ürəkaçan olmayıb:
"İndi bir sıra təhdidlər var və yeni dünya siyasi nizamı qurulmaqdadır. Yenə də təhlükələr mövcuddur. Məsələ ondadır ki, Estoniya Rusiya ilə qonşudur. Azərbaycan-Estoniya arasında münasibətlər qarşılıqlı maraqlar və qarşılıqlı təhlükəsizlik baxımından əməkdaşlıq əsasında inkişaf etməlidir. Məhz Estoniyanın Azərbaycanda səfirlik açması ikitərəfli əlaqələrdə mühüm addım ola bilər. Əgər Estoniyanın xarici işlər naziri Azərbaycanda səfərdədirsə, deməli, ikitərəfli əlaqələri inkişaf etdirmək istəyirlər. Azərbaycan da bu əməkdaşlıqda maraqlıdır. Xalqlarımız arasında dostluq münasibətlərinin tarixi kökləri var. Mədəni əlaqələr, siyasi əməkdaşlıq, təhsil, elm, humanitar sahələrdə və həmçinin iqtisadi-ticari əlaqələrdə yeni perspektivlər mövcuddur. Azərbaycanla Estoniya arasında bu müstəvidə əməkdaşlığın inkişafı hər iki dövlətin maraqlarına xidmət edir".
