ABŞ generalı Kristofer Donahuenin Kalininqrad bölgəsinə mümkün zərbə ilə bağlı bəyanatı ciddi narahatlıq doğurub.
Teleqraf xəbər verir ki, Rusiyanın tanınmış hərbi müxbiri Aleksandr Kots bu fikirlərin Üçüncü Dünya müharibəsinə səbəb ola biləcəyini bildirib.
Kots teleqram kanalında yazıb ki, Donahuenin bu təşəbbüsü reallaşarsa, nəticələrini proqnozlaşdırmaq mümkün olmayacaq: “Kalininqrad vilayətinə zərbə III Dünya müharibəsinin başlanması demək olacaq ki, bu da qaçılmaz nüvə zərbələri mübadiləsinə gətirib çıxaracaq. Bu avantüranın nəticəsini heç bir təlimlə öncədən qiymətləndirmək mümkün deyil".
General Donahue daha əvvəl bəyan etmişdi ki, Kalininqrad bölgəsi hər tərəfdən NATO ölkələri ilə əhatə olunub və ABŞ hərbçiləri bu regionu eşidilməmiş sürətlə məhv etmək imkanına malikdir.
Məsələ ilə bağlı Rusiya Dövlət Dumasının Kalininqrad vilayətindən olan deputatı Andrey Kolesnik də açıqlama verib. O, Donahuenin fikirlərini sərt şəkildə tənqid etsə də, ABŞ-ın belə bir addım atmağa cəsarət etməyəcəyini vurğulayıb.
