Amerika Birləşmiş Ştatları, Yəmənin şimalında husilərə qarşı zərbələr endirməyə davam edir. Bu barədə ABŞ Mərkəzi Komandanlığı (CENTCOM) məlumat yayıb. Husi mediasının verdiyi məlumata görə, son 24 saat ərzində 15 zərbə endirilib. Husilərin sözçüsü həmçinin bildirib ki, hava hücumundan müdafiə qüvvələri yerli istehsal olan raketlə ABŞ-ın MQ-9 pilotsuz təyyarəsini vurub.
Hərbi-siyasi ekspert Həşim Səhrabli “Sherg.az”a bildirib ki, Amerika Birləşmiş Ştatları dünyada baş verən hadisələrə öz milli maraqlarından yanaşır:
“Ümumiyyətlə harada Amerikanın hərbi kontingenti, əsgərləri, iqtisadiyyatı və şirkətləri varsa, orada bir regional qarşıdurmadan söhbət getməlidir. Yəməndə olan məsələ də bundan ibarətdir. Yəməndə Amerika Birləşmiş Ştatları təkcə Husilərlə deyil, eyni zamanda regionda dünya təhlükəsizliyinə zidd olan İran rejimiylə də mübarizə aparır. Yəni iki imperial qüvvənin qarşıdurması var. Bir tərəfdə bütün müharibələrin iştirakçısı Amerika, digər yanda isə terrorizmi dəstəkləyən İrandakı fars rejimi dayanır. Əgər iki imperial qüvvə toqquşursa, bunun asanlıqla bitəcəyini gözləmək mümkün deyil. Ya bu qüvvələr arasında yekun müharibə olaraq hansısa tərəf qalib gəlməlidir. Lakin sözügedən vəziyyət də davamlı həll yolu deyil və 30-40 il sonra yenidən revanş siyasəti başlaya bilər. İkinci bir həll yolu isə tərəflərin kompramisə gedərək razılığa gəlməsidir. Belə olan halda hər iki tərəfin maraqları müəyyən mənada reallaşır. İndi isə regional faktorlara baxdıqda ABŞ və İran arasında ziddiyətlər o qədər təzadlıdır ki, yekun razılığa gəlmək mümkün görünmür. Ona görə də Husilərin bəhanəsiylə Amerikanın zərbələr endirməyə davam edəcəyinin şahidi olacağıq. İranın isə Husiləri dəstəkləyərək Amerikaya qarşı öz mövqeylərini qoruyacağını görəcəyik. Bu isə Donald Trampın İrana qoyduğu şərtlərdən asılıdır”.
